胡定欣求突破要同自己鬥
早已攞過「飛躍進步女藝員獎」的胡定欣，未因得獎而停下來，因她明白到競爭激烈，必要令自己繼續向前，為的不是獎項，只為做好自己。
胡定欣在《刑警》及《巾幗梟雄之義海豪情》中均有份演出，兩個角色同屬反叛少女，對定欣來說，哪個較難演呢？她說：「兩個角色都唔同，《義海》個難啲，因為我從未拍過民初，呢個角色嘅反叛、任性係十級，以前只係一般嘅任性，加上之前《巾幗梟雄》收得，大家不容有失，更大壓力；而《刑警》嘅角色較靜態，但角色有經歷，好充實，角色比較大個女，我要用番大個女嘅心態去演繹。」
不強求 冇計較
早在○八年，定欣已奪得「飛躍進步女藝員獎」，但她未有因此停下步伐，一直尋求突破，不過在《義海》中，第二女主角卻是陳法拉，定欣倒覺得沒所謂：「其實競爭年年都有，就算係女主角都有競爭啦，係鬥都係要同自己鬥，唔好原地踏步，要不停進步，每個人際遇唔同，最緊要做好自己，理唔到咁多。（主動爭取角色？）從來都唔爭取，係監製睇你適唔適合，我哋都相信監製嘅眼光，每個人風格都唔同，亦都冇得去計較。」
實事求是的定欣一心想着如何突破自己，她會做更多，看更多，希望在不同階段有不同的見識，作出不同的演繹。
文：影視組 攝：劉智源
場地：Hooray
髮型：Matt@Xenter
化妝：Jessica Chan