JM細膽拒跟老闆鍊番轉
「模Art」Janice Man（JM）昨日出席奧海城活動時被公關指遲到近一小時，但她堅稱自己向來守時，其公司工作人員即時緊張解圍，指可能溝通上出了誤會，Janice受寵程度可見一斑！
昨日Janice Man以代言人身份出席DOCTOR KITS化妝活動，原定大會通告是中午十二時，但等了四十分鐘活動還未有動靜，於是向公關查詢活動何時開始？公關稱因Janice還未到場，故活動才未開始，最終Janice在下午一時才現身。問Janice為何遲到一小時？她即緊張地說：「我冇遲到，我通告係一點鐘，（但公關話你遲到喎？）我一早就去咗salon整頭，我係準時到架，可能中間有啲誤會，一陣我都想問番係邊度出錯。」
問Janice平日工作有沒有遲到？她說：「冇，除非有意外塞車，我一向工作都好準時，（會唔會提早出門口？）每次做嘢公司都有司機嚟車我，所以每次都好準時，都唔使太擔心，我覺得準時好緊要，做嘢最基本就係要守時。」
愛揸車唔使男友接
談到老闆黎明以五百萬買了一架法拉利，她聽罷即說：「好戥佢開心，佢不嬲都鍾意靚車，其實好多人都有儲車習慣，但我自己就冇。」記者笑言她可要求老闆「載一轉」？她指自己很膽小，不敢坐快車，自己駕車也開得很慢。問到可會坐男友車？她說：「我自己揸車多，因為愈嚟愈獨立，而且一個人揸車自由啲，聽吓歌當減壓。（好似同男友感情好淡？）唔係，我鍾意自己揸車架！」至於可有試過駕車時被陌生人搭訕？她笑說：「隔住玻璃點會，（追你車？）我唔會同人鬥快。」
文：名人組