周柏豪冇份賀壽酸溜溜
周柏豪、G.E.M.（鄧紫棋）及葛民輝昨日出席麥當勞活動，對於有指他被張致恒撬牆腳，冇份賀緋聞女友何超雲的賭王父親何鴻燊生日，柏豪一臉醋意表示：「係啦，我冇收到通知，如果佢叫到我好樂意出席！（同世伯講生日快樂？）我冇機會講嘛，在心中！（甩難？）唔係，太多緋聞對我工作都唔健康，我想專注事業。」
柏豪和G.E.M.異口同聲表示聖誕要在工作中度過，問G.E.M.會否跟緋聞男友林宥嘉歡度聖誕？她說：「要開工，冇機會慶祝！（送禮物？）我唔興送禮物，會講聖誕快樂！（分咗手？）哎呀，唔講呢個話題，你哋成日玩我！」問G.E.M.恨唔恨過浪漫聖誕？她笑言：「就算開工場地有燈光都好浪漫！」
此外，何超雲及超蓮昨日不約而同在微博上載賭王父親的壽宴相，衣着性感的超雲俯身與父親合照時春光乍現，而超蓮亦大騷跟父母及小朋友的合照，她更笑指母親的表情「都怪怪的」。