祥仔雯女巨頭撐腰冧莊帝后
無綫視帝、視后競爭戰況激烈，連日來傳出不少揣測，不過昨日頒獎禮之評審委員會六位巨頭終投下其神聖一票，「劉醒」黎耀祥和「鄭九妹」鄧萃雯將冧莊攞獎，後日（五日）舉行的頒獎禮上，這對絕配將再稱帝后。
《萬千星輝頒獎禮2010》將於後日假電視城舉行。全城矚目的視帝、視后花落誰家，連日來坊間都有不少揣測，但觀眾投票已於上月廿八日截止，所有票數亦在律師樓點算好，而操控「生死」票數的六位巨頭，包括：樂易玲、何麗全、梁家樹、曾勵珍、何冠中和陳家揚，昨終在無綫為這次頒獎禮而成立的評審委員會投下其神聖一票。
據可靠消息透露，六巨頭投票意向是黎耀祥和鄧萃雯「冧莊」攞視帝、視后，至於觀眾投票的數字所得，目前視帝五強為（排名不分先後）：林峯、馬浚偉、黎耀祥、黃日華和陳豪；而視后五強則屬佘詩曼、鄧萃雯、鍾嘉欣、楊怡和宣萱。
三棲林峯勢做巨星
獎項一日未頒一日仍存有變數，雖然黎耀祥挾剛播完的《義海豪情》氣勢如虹，感人情節讓觀眾津津回味，牌面似乎佔優，但陳豪爭「視帝」最大本錢莫過於是無綫的「親生仔」，加上在《公主嫁到》的出色表現，鬼馬演出展露喜劇天分，「稱帝」亦情理兼備。不過，《公主》已播完一段時間，觀眾淡忘下順理較「蝕章」，但無綫近期卻連番出招為陳豪再「稱帝」鋪路，繼安排他在台慶夜頻頻亮相爭取曝光後，無綫副行政主席梁乃鵬更高調地在上周五設宴款待《公主》演員，明顯向陳豪投下信心一票。
黎耀祥接受訪問時表示今年「視帝」之爭相當好玩，猶如華山論劍，不同派別的人馬齊全，當中包括偶像實力派林峯、喜劇派的陳豪等，問他個人看好誰時，他坦言：「其實我睇好林峯，呢行好需要偶像，偶像係一個代表，帶領年輕一代，畀大家正能量，就算唔係今年，佢都會成為巨星偶像派接班人，都好耐冇人試過歌、影、視都咁有成績。」
陳豪掛「半個贏字」
祥仔近幾年運勢不俗，他透露十八歲時曾「貪得意」去批命，他說：「批命話我三十歲過後會有一個運，指係『吐氣揚眉』﹐而《西遊記》正正係我一個好大嘅轉捩點；至於四十歲，指我會『奇光異彩』，嗰陣時諗，嘩！會唔會誇得滯呀！又估唔到上年攞咗三個獎，呢廿年都係一個好運嘅年頭。」
而陳豪亦惺惺相惜，他表示：「祥仔係我好欣賞嘅演員，我哋大家對於攞獎都係抱住平常心，但係氣氛緊張啲幾好呀，觀眾睇得開心啲，不過當然自己攞就最開心啦。其實今年運勢幾好，之前都攞咗幾個出面嘅獎，我覺得依家心口已經掛住半個贏字。」
黎耀祥髮型：Ivan Lee@HEADQUARTER
場地：天與地（諾士佛臺）
攝影：李柏儒
文：影視組