栢芝叫聲嘉玲姐是非當宣傳
【蔡志豪澳門直擊】最近復出影壇的張栢芝與劉嘉玲合作，不過拍攝以來從未見過同場合照，有人更將二人片酬作比較，惹來不和之說。栢芝昨日到澳門開工時，雖未有回應，但她於助手微博留言，直指傳聞無聊當宣傳，並叫對方做「嘉玲姐」來闢謠。
栢芝、古天樂、杜汶澤、熊黛林（Lynn）、閆妮等昨日到澳門為賀歲片《最強囍事》拍攝結婚戲。杜汶澤與栢芝飾演一對新人，期間古仔及Lynn突然出現搶親，揸槍的Lynn更以高八度聲音講對白，場面搞笑。
黃百鳴爭住答
身穿白色露肩裝婚紗的栢芝配以六百萬鑽飾，十分省鏡。電影公司事前已表明栢芝受訪只會談電影，否則離場。問到栢芝與嘉玲未試過同場出現，是否鬧不和？在旁的黃百鳴即代她否認，及後栢芝附和謂：「傳出嚟！（你兩個日薪有分別！)」栢芝未有回應，反而黃百鳴再搶答解圍。
問到為何挑選《最》片為復出作品？栢芝說：「生仔之後第一部想拍開心、感覺輕鬆嘅喜劇，新年電影好開心同舒服。不過初初拍番係有緊張，咁多年冇拍，好在大家都冇陌生，導演對電影熱誠冇畀到我壓力。」栢芝更自爆老公謝霆鋒與老爺兩日前探班，不過霆鋒向來寡言，只逗留十五分鐘便離開。再問有否與傳不和的爾冬陞聯絡？她即「你眼望我眼」，最後要黃百鳴終止訪問來解圍。另外，栢芝與古仔合照過後便拉起婚紗鬆人，未有留下拍攝單人照。古仔大讚老拍檔栢芝婚後愈趨成熟，經常掛念兩個囝囝。
雖然栢芝未有回應與嘉玲不和傳聞，但她之後在助手微博留言，對不和傳聞感無聊，又指有傳媒打擾杜汶澤，追問她是否經濟有困難，老闆才給予高片酬。栢芝謂：「我一切也十分安穩……多謝有心炒作我和我的好友『嘉玲姐』的傳媒，幫助這部戲作免費宣傳。」
Lynn爭取愛情
另外，Lynn於片中與杜汶澤乃青梅竹馬，雖然身高有異，但Lynn笑言冇有怕：「平時出街都好少男仔高過我。（郭富城有冇讚你有搞笑天分？）套戲都未出。（現實會唔會搶婚？）都會爭取，有人爭先會珍惜。（好多對手？）唔知，鍾意對方會爭取。（城城使唔使爭？）暫時冇同人爭過。（個心好定？）我情緒不嬲都好穩定。」