張栢芝行善捱眼瞓靠囝囝提神

張栢芝昨日一身便服打扮出席於又一城舉行的「救助兒童會」《織善冷帽》慈善義賣日2010，雖然前晚拍戲至通宵，不過在台上的栢芝依然表現得精神奕奕且全程笑容滿面，又與一班小朋友大合照，還親自為小朋友戴上冷帽，盡顯母愛的一面。

每日拍廿粒鐘

栢芝在台上表示：「自己由18歲出道到依家30歲，生咗兩個好得意嘅ＢＢ，自覺好開心同好幸運，經歷咗咁多事，上天對我好厚待，我想幫助多啲有需要嘅人，幾辛苦我都會抽時間做慈善工作，幫人係我一向嘅目標，我會朝呢個方向繼續。」提到兩個兒子，栢芝說：「我連續兩個月拍戲，每日都拍廿個鐘，身體好攰，但返到屋企有兩個好愛我嘅囝囝歡迎我，令我心靈上好舒服；雖然依家日做夜做，但我寧願犧牲瞓覺嘅時間都要陪佢哋。同埋我依家震騰騰，因為要去內蒙古拍戲，早兩日聽到內蒙古受30年嚟最大風雪襲擊，所以好擔心。」

栢芝跟義工一起織冷帽，並呼籲大家捐錢做善事。

栢芝替收音師攞咪，幫得就幫。

最大興趣拍戲

她覺得趁後生應做自己喜歡做的事，她最大的興趣就是拍電影，當兩個囝囝再長大些，她便會重返媽咪的角色。問到怎樣過聖誕，栢芝說：「聖誕節都喺內蒙古過，有少少心噏，唔可以陪老公同囝囝，不過唔緊要，拍完戲我就會全情投入返佢哋身邊。」另外，有工作人員上載了一張栢芝拍戲時替幕後收音師拿咪的照片，原來她知道很多工作人員十天沒有睡覺，即義務為大家減輕工作量。

文：名人組