謝安琪守得雲開Sing途上揚
謝安琪（Kay）昨日到大埔超級城出席聖誕開幕禮兼為新碟《第2個家》舉行簽唱會，吸引300 fans捧場，Kay穿了Sass & Bide上衣襯短裙亮相，她謂新碟在台灣和內地反應好，雖然是國語歌，亦上到香港的流行榜，感到好滿足。
對陳總有信心
問不能上無綫有冇影響？她說：「冇計過影響，工作量差唔多，穩步上揚，唔擔心收入，自己生活好簡單，我唔係倒水嘅人，心願係透過工作做善事。」對於陳志雲復職即搞掂無綫與酒吧業的版稅，問會否希望四大唱片問題都隨之解決？她說：「我認識嘅陳生好和氣，係睇遠景嘅人，對佢有信心，對自己唱片公司都一樣，依家樂壇多事，但步伐向好，版稅唔會係長時間問題，四大歌手都好受歡迎。」
領取傑青殊榮
此外，前晚Kay出席傑青頒獎禮領取殊榮時，就全家現身見證Kay攞獎，她說：「昨晚係私人晚宴，所有得獎人同家人分享。（老公有冇送禮物？）冇諗過收禮物，傑青已經係最大禮物。」
文：音樂組