雯女唔輸得：鄭九妹掉轉寫
今屆台慶視帝大熱黎耀祥昨日負着腳傷上陣，下午出席完活動，晚上又一拐一拐出席《義海豪情》結局，連環拉票，祥仔笑言對冧莊視帝有信心，預言結局能打破韓劇《大長今》50點收視，而雯女就誇下海口若收視不敵《大》劇，鄭九妹三個字掉轉寫。
處境劇《天天天晴》及台慶劇《巾幗梟雄之義海豪情》昨晚播映結局篇，兩劇演員傾巢而出，計有王喜、毛舜筠、劉丹、李思捷、鄧萃雯、陳法拉、金剛等，由於黎耀祥均有演出兩劇，故他以壓軸姿態，與兩劇拍檔雯女及毛毛一同亮相，無綫亦安排500名觀眾與眾主角在電視城一同觀看大結局。
客串賀歲片扭傷腳
走路一拐一拐的祥仔，透露前晚通宵為賀歲片《我愛香港》客串，期間不慎扭傷左小腿，不過卻未有立刻求診，他謂：「曾志偉話踢波好常見，個幾月就會好番。」對於《義海》結局篇收視，祥仔信心十足：「咁網上點擊率過百萬，同埋星期日啲觀眾唔會等睇網，所以都有信心。（攞視帝呢？）都有信心，不過都要睇今晚收視成績，因為商業頒獎禮都要有商業元素，今晚就係一個指標。」而祥仔於下午時則現身藍灣廣場出席活動，同場還有信和集團商場推廣總經理蘇蔡潔蓮女士。
專程從內地度期返港的雯女，表示每次返港均為該劇宣傳，令不少賺錢活動也要推掉，雖然損失不少，但卻認為值得。
雯女預計殺入五強
有份角逐視后的雯女，問到有否趁機向現場觀眾拉票？雯女謂：「唔使，只要有睇自然會投票，搵三千東泰門生同我拉囉。（有冇同高層打招呼拉票？）有同陳生（陳志雲）握手打招呼，都好耐冇見。（最大對手係阿佘？）唔知，不過頒獎禮我度咗期返，因為估自己會入５強，呢個係香港電視行業盛會，要支持嘅。（預期收視贏《大長今》？）一定要贏。（輸咁點？）接受現實囉！如果輸咗，鄭九妹三個字就掉轉寫。」
至於陳法拉亦表示已於微博呼籲大家捧場，問到有否叫「奶奶」捧場？法拉指會叫身邊人捧場，望藉此拉高收視，對於今年台慶提名叫三飛，法拉仍表示望再嘗奪女配角滋味。
《義》劇播映期間，一名年約50歲的現場女觀眾突不適，要由救護車送往醫院。
文：影視組