吳浩康火遮眼借醉嗌分手
歌手吳浩康（Deep）跟模特兒女友莊思敏（Jacquelin）拍拖多年，Deep昨日凌晨突然於微博宣布分手，更怒斥「狗公們滿意了吧？」，令人懷疑他不忿Jacquelin身邊的裙下之臣。
Deep跟Jacquelin向來恩愛，不時雙雙出席活動場合，早前更有傳二人明年拉埋天窗，而前晚Deep跟Jacquelin拍住拖出席蕭定一的婚宴，直至昨日凌晨一點，Deep突然發微博說：「和她到了分手這一刻，狗公們滿意了吧？」此言一出，不少歌迷都非常震驚，更追問二人分手是否牽涉第三者，樂壇新人吳若希都留言慰問：「what's going on？」不過Deep很快就刪除有關留言，相反Jacquelin昨午反擊留言說：「最討厭喝完酒會躁狂的人，自我控制能力這麼低，酒精遲早害死你！」
勸戒酒當耳邊風
本報致電Jacquelin求證，她表示：「件事唔講咁多，我哋冇分手，亦冇牽涉第三者，只係佢飲醉酒，（佢寫『狗公』喎？）佢喺唔清醒之下做呢件事，婚禮上面飲大咗，根本冇任何事發生過，（勸佢飲少？）有勸過，但勸同埋聽係兩回事！」
床頭打交床尾和
Deep昨早參與馬拉松活動，他跟鍾舒漫、張致恒及關智斌均獲英皇證券的贊助參與賽事，不過跑步期間都照發微博，似乎心情未受影響，他說：「跑的途中讓我想通了很多事情，在今天我對我自己許了一個承諾，如果做不到我就再面對不了自己了！」未知是否指戒酒一事。
記者事後聯絡上Deep，他說：「冇事，耍吓花槍啫！件事唔關酒精事，不過我係一時之氣，（狗公係？）係一場誤會，婚禮上面見到個男性朋友同Jacquelin傾偈，仲要指住我，我覺得佢話緊我，一時火遮眼咪同Jacquelin嘈起上嚟，兩個火星撞地球咪吵一鑊囉，之後冇事喇，搞到大家緊張，真係唔好意思！」而Deep晚上於微博上載跟Jacquelin的合照，二人攬頭攬頸做鬼臉，力證關係不變，他說：「大家放心，我們很好，多謝關心！」
文：音樂組