時間錦囊：胡定欣舞出一片天
○八年成為無綫「飛躍進步女藝員」的胡定欣，最近性感演出一鳴驚人！原來她小時一心想成為教師或時裝設計師，可幸未被媽咪制止學舞，否則無綫少了個好演員，現在就一起見證定欣的成長歷程！
我雖然係大家姐集萬千寵愛，但父母家教好，從無縱壞，加上屋企又大家族，所以自小就好尊重長輩，對我入行後對前輩、同事嘅關係有正面影響。
睇見堂姑姐着住紅十字會制服覺得好靚好威風，跟住就參加咗，嗰幾年學會團結同紀律，仲做埋領袖，每年都要帶新人，一手一腳處理好多事，訓練到獨立性。
中學開始跳舞，對我工作影響好大，拍打戲或《舞動全城》時好大幫助！記得當年曾搬去新界，媽咪怕我練舞夜歸，食飯時叫我唔好學，搞到我邊食邊喊，佢先肯心軟；依家我成日笑佢，如果當年唔畀我學真會恨佢一世。
細個「我的志願」都係教師之類，曾想過做時裝設計師，反而冇諗過做演員，不過讀咗一年時裝設計課程覺得好鬼悶，再冇興趣，於是○一年參加《Cover Girl選舉》贏咗加入無綫，先發覺自己真正嘅興趣係喺舞台。
