《刑警》台慶夜受冷落 三哥微博開火轟無綫
無綫台慶夜一眾演員開開心心、扮鬼扮馬為六叔賀壽，未料因安排不善辣了Mad Sir（苗僑偉）和Stone Sir（黃日華），兩人昨在微博發火，指他們演出的《刑警》在台慶夜隱形，不獲邀請出席全不受重視，昨日兩人更向記者說：「究竟發生咩事？我哋係咪得罪咗人？」
前晚無綫43周年台慶，由序幕到趣劇，均由力捧的男、女演員以所演劇集的角色來包裝，陳百祥在序幕中穿梭多套叫好叫座劇集包括：《公主嫁到》、《義海豪情》、《讀心神探》、《談情說案》等劇集及演員作介紹，反而口碑及收視直逼《義海》的台慶劇《刑警》卻完全隱形，大部分演員也沒有被邀出席，至於劇中的胡定欣是以其他劇集身份亮相。
黃日華忍唔住爆粗
《刑》劇中演Mad Sir的三哥苗僑偉和演Stone Sir的黃日華為此慶爆，昨日分別於微博上怒吼。
其中黃日華Stone Sir自我形容為憤怒、噴火：「有人話：叫好叫座的劇集不獲重視、缺宣傳（靠自己演員去做）、屢遭打壓……我黃日華好想問是哪間公司？」之後三哥Mad Sir回覆說：「非公司……是人為？」結果噴火Stone Sir忍不住爆粗說：「totally very bad，我頂！」
記者昨向二人了解，三哥坦言公司不重視《刑》劇：「之前已少宣傳，依家又不獲邀請出席台慶，究竟發生咩事？係咪得罪咗人？」黃日華則說：「好多影迷都問我點解會咁？我都想知點解，我都係觀眾，我唔知公司咩政策囉。（會向公司了解？）唔使嘞！叫公司喺電視度解釋啦。（冇邀請你哋《刑》劇演員出席咩？）冇，一個都冇，個劇冇提都算，公司都應該係咁意問吓我哋出唔出吖……點知一個都冇問，我有問過三哥、宣萱。」《刑》監製唐基明都覺得這個對待不公平：「公司應該不分大、細去照顧演員，惟有講句真金不怕紅爐火，個劇口碑好咪得囉！」
「有不滿點解唔講」
台慶節目監製衞世輝則不以為然，指台慶並非宣傳劇集渠道，主要為台慶做些輕鬆節目娛賓，他說：「《刑》劇係紀律部隊劇，嚴肅唔可以攞嚟玩，其實《天天天晴》都冇請，我哋考慮啱玩先安排，就算好多演員冇演出都自動上嚟玩大抽獎，又唔明點解佢哋（三哥、黃日華）唔嚟，不過安排演員係藝員部負責，我都覺得好慘，唔明演員如有不滿，點解事先唔嚟講，我電話長開，有投訴點解唔打嚟講！」
文：影視組