張曼玉：簽婚前協議書肉酸！
張曼玉（Maggie）鮮有開腔談感情事，昨晚她在港直言與男友感情十分穩定，但未有再婚計劃，且表示不嚮往婚姻帶來的安全感，認為開心最實際，更妙論「離婚分身家」，十足戀愛顧問。
Maggie昨晚在港亮相汽車品牌活動，悉心高貴打扮現身的她型格十足，且停步五分鐘接受在場傳媒的訪問。她表示今次將留港一星期，然後再遊歷北京及歐洲等地，談到男友Ole Scheeren，Maggie大方的說：「佢喺北京忙緊，冇陪我返香港，總之我哋仲拍緊拖，冇變過。（冇計劃結婚？）冇呀，我唔需要而且唔相信婚姻帶嚟嘅安全感。」
最緊要開心舒服
早已離婚多時的Maggie，談到對上一段婚姻，她仍無怨無悔，且坦言現在選擇不婚，絕對不是「一朝畀蛇咬」：「唔覺得自己做錯過，再嚟多次我哋都會係咁，依家最緊要係兩個人生活開心，相處舒服。（香港政府立咗婚姻法，離婚要對分身家。）其實好多國家都有咁嘅法例，但如果合唔嚟，兩個人唔應該結婚，婚前講定離婚點樣，我覺得咁好肉酸囉！」
記者阻住約偉仔
問到今次返港，會否找老友敍舊？Maggie表示有此打算，不過當提到好友梁朝偉時，她即說：「唔會特別約佢嘞，你哋（指記者）喺度，點約呀？」至於聖誕節將至，Maggie表示還未落實如何慶祝，但又補充說：「多數會同佢（指男友）一齊架嘞。」共度佳節果然sweet到爆！
此外，昨晚劉嘉玲在微博祝賀老友張叔平生日，還上載兩張二人抱抱及親面珠照。
文：影視組