黃子華玩殘嘟姐偉仔
黃子華談及娛樂圈血淚史一貫敢言，不但斗膽將整容及鄭裕玲串連一起、揶揄梁朝偉「啷啷」，甚至自爆因樣衰被女星拒絕拍接吻戲。兩個半小時冇花冇假的真人騷，連開八場，保守估計子華狂吞二千餘萬進帳！
一連八場的《黃子華棟篤笑20年娛樂圈血肉史II》前晚假紅館揭開序幕，吸引不少圈中人包括鄭裕玲、鄧健泓、原子鏸、劉青雲夫婦、蒙嘉慧、陳輝陽夫婦、吳鎮宇、胡楓、徐天佑、許鞍華等捧場，全晚座無虛席，氣氛熱鬧。據悉，這個talk show在欠缺宣傳下賣個滿堂紅，令子華低調躋身千萬身價之列，名副其實的「食腦」！
道盡娛圈辛酸史
子華前晚道盡親歷的娛圈血淚史，提及當年憑《男親女愛》走紅，即指着台下問：「嘟姐（鄭裕玲）有嚟呵？當年係佢同我講：『子華，你依家夠紅嘞，去執執個樣啦。』」隨後更愈講愈踩界，就連梁朝偉亦不放過：「演員適當時就要除褲，好似劉青雲同吳鎮宇呢兩個受尊崇嘅演員，咪又係打出pat pat喺大銀幕慢慢行！梁朝偉喺《色，戒》度唔單止演漢奸，佢仲係中國國際鋼琴大師，郎朗呀！有需要就除褲，最多畀個好啲嘅化妝師我，幫『啷啷』化妝，雖然我唔知點樣嘅『啷啷』先叫好睇！」令全場掌聲雷動。
他續爆當年減去四十磅，花去四個月時間扮演末代皇帝溥儀，結果收視未如理想，更因此患上抑鬱症；又如當年自己開拍《一蚊雞保鑣》，亦同告失敗：「死都要死喺自己手上，有人話戲名已經預測到票房，最絕係有人話應該改名叫《一蚊雞棺材》，梗係啦，一蚊買到副棺喎，咪即係『抵死』囉！」子華又指不少圈中人正忙於趕拍《狠狠的等》：「女演員最慘，都未做過中女，就已經變咗人阿媽！苑瓊丹第一次同我合作就做我女友，喺《男親女愛》已經變咗我姑姐，如果再合作，我相信佢會係我阿媽，但其實佢細過我o架！」
買樓話題笑爆嘴
自知樣子不算俊俏，子華坦言曾遭某女星以宗教為由，拒與他拍接吻戲：「點知轉頭佢就去同任達華拍喎！好彩當日我冇問佢信咩教，如果唔係咪攞嚟瘀囉。」他又自爆當年曾打算投考警察：「不過我個樣唔似（警察），如果考到去查人身份證，問人哋屋企係租定買，佢答我買嘅話，我就會斷定佢唔係香港人，乜香港人仲買得起樓咩？」他又表示絕不會因私生活公開道歉：「都唔明點解車震道歉、偷食道歉、結婚又要道歉……張子強同葉繼歡都未道歉，我哋邊有資格出嚟道歉呀？」子華金句多多又幽默，令觀眾笑足全晚！
文：影視組