呂慧儀莊思敏互讚好手感
呂慧儀與莊思敏比堅尼火併身材，互相咀嘴大玩曖昧，前者更笑言要挑戰吳浩康（Deep），莊思敏談到男友慨嘆事業冇起色，直言無限量支持他，着他靜待機會。兩女更笑言已互相驗身，互讚手感超好！
呂慧儀、莊思敏、「萬寧哥哥」沈志明、詹瑞文等昨齊集清水灣片廠開工，拍攝將舞台劇《潮性辦公室》改編拍成的同名電影，兩女毫不吝嗇身材，以泳衣登場頓成焦點所在。
任務演「事業線」
電影由王晶監製，行性感的呂慧儀獲晶哥「收歸旗下」成為晶女郎，她說已「領正牌」得到無綫首肯。兩女有機會跟詹sir免費學戲，詹sir則抵死叫呂慧儀首要任務是表演「事業線」！問她可擔心遭定型？呂慧儀笑說：「咁我都仲有好多嘢可以sell嘅，好似白癡同低能，完全切合今次嘅角色。」她與同是模特兒出身的莊思敏老友鬼鬼，二人笑言拍戲期間已互相驗身，更互笠高帽說大家都「好好手感」，呂慧儀抵死的說：「我企喺佢身邊，自己即刻變了『小人物』。」
吳浩康復出打拳
談到Deep在微博上慨嘆遭投閒置散，決定「復出」參加泰拳比賽，莊思敏直言知道男友有此打算，問她會否擔心Deep？她說：「擔心佢會打死人？哈哈，以前練習佢成日都手腫腳腫，我都慣晒嘞，只要唔好打到塊面就得。（佢冇工作？）佢喺屋企好勤力咁寫歌，有時啲嘢要等機會嘅，我全力支持佢。」
詹sir則透露早前接獲林嘉欣電郵邀請他到加拿大探BB，因工作繁忙，最快也要下月才成行。可有向嘉欣打探何時「出山」拍戲？詹sir說：「佢休養生息啫，同我合作過嗰啲女演員，轉頭就有幸福家庭。」
文：影視組