蔡楓華開騷阿倫獻Sing撐
譚詠麟前晚出席CASH頒獎禮與蔡楓華同場，阿倫主動折返會場鼓勵密謀重出江湖的蔡楓華，更答應任對方個唱嘉賓，但當阿倫得悉蔡楓華被封「四大癲王」即尷尬表示：「冇呢啲嘢！」
繼早前現身《勁歌金曲》獻唱後，蔡楓華前晚以CASH會員身份出席「2010 CASH週年晚宴暨金帆音樂獎頒獎典禮」。一身黑色西裝襯帽及黑超的蔡楓華明顯悉心打扮，在多名工作人員陪同抵達頒獎禮。不過當記者要求蔡楓華企定定拍照時，他竟一支箭進場。
搵記者做證
頒獎禮舉行期間，蔡楓華坐在舊拍檔盧敏儀與孫敬安中間，他一時風騷滿場飛，一時又自顧地「隊酒」，表現反常。期間記者要求跟他做訪問，但他cool爆說：「我要睇騷！」
擔任頒獎嘉賓的阿倫得悉蔡楓華在場，即主動要求見面為其打氣。對於蔡楓華計劃「復出」開個唱，阿倫說：「我好耐冇見佢，好事吖，多啲唔同音樂。（佢畀人話係四大癲王之一喎！）唔係，冇呢啲嘢！」
及後阿倫更折返會場跟蔡楓華握手，蔡楓華甫見阿倫即表現驚訝，當阿倫說出支持及鼓勵說話時，蔡楓華即激動得捉實阿倫雙手頻說謝謝，並說：「我遲啲開演唱會，想請你嚟做我嘉賓。」阿倫表示：「一定一定。」蔡楓華即手指指：「成班記者做證o架！」阿倫答他：「唔使做證，你開演唱會我實撐你。」蔡楓華即一臉感激捉實阿倫攬頭攬頸。
主動付車資
蔡楓華離開頒獎禮後，先送一名女子上的士，然後與一男友人乘的士往荃灣某酒店，蔡楓華主動付車資。當記者上前拍照，蔡楓華即企定定說：「我上去傾嘢，夜喇，唔阻大家收工，唔好搞喇。」
文：音樂組