黑人做外援 邱淑貞打氣 余文樂輸波捱批

樂仔及柏豪前晚為所屬的籃球隊橫洲工業出戰，曾是職業籃球員的好友黑人特由台灣飛到增援，場館擠滿眾多粉絲支持偶像外，樂仔的好友郭富城、沈嘉偉帶埋太太邱淑貞（豆斗）到場打氣，產後的豆斗身穿鬆身衣服，手腳都明顯纖幼，不時為隊伍落力打氣。

被反超前

比賽期間，三位都搏到盡比賽，樂仔兩度被對方球員侵犯而受傷，他瞓在球場中央攬實個肚，狀甚痛楚，歌迷立刻起哄噓爆對方球員。柏豪因下午剛完成另外一場賽事，體力透支，比賽長時間都坐冷板櫈，變相由經驗老到的黑人領軍，頭兩節都由橫洲工業稍為領先，後來卻被對方反超前，最終以44:55戰敗，屈居亞軍。

黑人陳建州（右）由台灣來港出戰，拍住樂仔上陣殺敵。

沈嘉偉帶埋太太豆斗支持余文樂。

借籃圓夢

賽事完畢後，三人在場外跟歌迷合照留念，隨後到灣仔打邊爐慶祝，沈嘉偉、豆斗及城城都有到場，玩到凌晨一時許才陸續離開，三人急不及待在微博分別上載合照。昨早返回北京拍戲的樂仔接受訪問時說：「輸波唔會唔開心，盡咗力啦，最緊要贏到觀眾投入程度，同埋成隊波比賽過程。（滿意表現？）合格啦，始終因為唔舒服，又冇乜點瞓，仲要畀對方球員批肘，條腰瘀晒！」他感激黑人守諾特別來港參與冠軍爭奪戰，亦感謝幾位好友抽空睇波，希望借籃球隊為社會帶來正面訊息，完成自己最愛的籃球夢想。

另外，柏豪早前拍攝短劇而走入時鐘酒店，跟女主角楊愛瑾開房，二人演戲時大感尷尬，他堅稱從未試過踏足時鐘酒店。

文：音樂組