深情對話：李克勤：做好老竇呢份工！

李：李克勤　 記：記者

爸爸經

記：做歌手難還是做爸爸難？

李：當然係做爸爸難，歌手做得唔好，最壞都係唱片唔賣得，下次再做過，但爸爸做得唔好就「掹」唔番，父母係仔女嘅榜樣，好多生活上小節及壞習慣都會影響到小朋友，例如踢波時唔好講粗口，食飯唔好戙高腳，小朋友真係學得好快。

記：做爸爸最難嘅地方？

李：條路好長好遠，最少要照顧到佢哋到十八歲，責任先告一段落，細路仔係張白紙，做父母要幫佢上色去畫、幫佢發揮潛能，培養佢哋啲興趣、專長，但唔可以逼佢哋做任何事，同我以前年代唔同，以前我哋所有知識來自父母、老師，但時代轉變好多知識、資訊都來自電腦，依家老師嘅說話唔一定啱，未必勁得過電腦。

長憂九十九

記：如果個仔鍾意踢波，你贊成佢做足球員？

李（微笑）：係囉！如果佢話揀踢波做足球員，都唔知點算好？雖然朗尼（曼聯球員）踢得幾好，但踢波喺香港好難搵食！依家嘅細路又話有讀書壓力，畀先生鬧幾句，又要生要死，仲未計有乜頭暈身架，做父母真係長憂九十九。

記：湊兩個細路係咪勞心勞力？

李（騎騎笑）：依家返工當放假！佢哋有無窮精力，好似上鏈公仔，玩玩玩，玩完一大輪就瞓，我要趁佢哋瞓咗，先可以做自己想做嘅事，睇番預先錄起嘅球賽，個個做父母頭幾年都係咁，畀到佢哋最好嘅禮物，就係相處嘅時間。

記：做人老公又點呢？

李：放低晒！基本上我同太太（盧淑儀）都擺低晒，不過每年都會搵幾日，兩人去旅行玩吓，咁樣對夫妻感情都好重要，好似七月我哋就去了日本玩。

記：犧牲晒兩公婆時間？

李：個個family都係咁，決定生之前我哋共識晒，依家最重要係兩個仔。

爛玩歲月

形象健康的克勤，在圈中稱得上是廿四孝好老公、好爸爸，但克勤卻自揭當年也有癲喪爛玩一面。

記：咁多年你都冇乜緋聞？有冇懷疑過自己魅力？

李（又笑）：係囉，返去檢討吓，連拍阿佘（佘詩曼）都冇事。惟有答我收得密啫，唔係點呀？驚死囉！好多事係睇有冇機會，依家做完嘢我就返屋企，我過咗玩嘅年紀好耐，我好早熟，廿幾卅歲已經玩完。

孭「槍」入差館

記：當年你好爛玩咩？

李：我廿幾歲時玩得好勁好癲，同無綫班老友劈到冧晒，喺街度飲酒大吵大鬧，乜都試過，玩到孭住玩具槍入差館，好得人驚，個段真係光輝歲月，不復當年啦。

記：諗番以前係咪感受良多？

李：當年寶記（寶麗金）真係好似一個family，大家感情好好，成間公司一齊去韓國旅行，小鳳姐（徐小鳳）又招呼我哋去佢度打羽毛球，打乒乓波聯誼，諗起都開心，依家真係唔同晒，冇得返轉頭，其實依家環球比我2000年返去時已經好好多，最初真係散散哋，好彩有精神領袖阿倫，佢地位崇高、德高望重，又得閒又諸事八卦，又鍾意扯頭纜，好難做架，係佢先得，我自問唔得，佢真係冇得頂！

情義兩難全

被冠以「無綫契仔」之名的克勤，在四大唱片與無綫版稅風波中，人氣縱有損失，卻贏得「義氣仔女」之名。

李：（哈哈）情義兩難全吖嘛！謀求出路架，我係好直接嘅人，你對我好我對你好，人係咁，你氹我，我氹你。我仲係第一個被無綫開刀，一年半載都走唔甩，預計差唔多啦，鬥氣夫婦對個family都唔好，商業社會冇話傾唔掂。

記：堅持唔亮相其他電視台？

李：我個case唔同，我同所有電視台都冇合約，都有上有線用廣東話訪問，情義唔係簽邊度？無綫就似我嘅母校，感覺個關係好close，我唔係冇諗過去其他電視台，但感覺怪怪咁，唔係怕秋後算帳，暫時做訪問ＯＫ，但唱歌做騷就未打破到心理關口，想好似以前咁，鍾意以前個模式，其實大家關係好好，只係某些原因暫時不相往來，唔代表大家唔好。

歌手經

記：做歌手唔難咩？

李：話難唔難，話易唔易，歌迷好簡單直接，好聽就畀掌聲，唔好聽冇掌聲，甚至噓你，我唱咗超過廿年生存到依家，總有歌迷喜歡嘅原因，每次做碟一定有歌迷喜歡克勤嘅抒情歌，但當然都要有新鮮感。

記：點樣去討好嗰班80、90後嘅粉絲？

諗住唱到老

李：我唔會刻意去爭去搶粉絲，每個人頭上一片天，當然我嘅target唔係15、16歲歌迷，但都有呢個age嘅粉絲，唔係佔大比數啫，做歌手梗係想吸納唔同年齡層面嘅歌迷，所以每張碟都要求變尋新鮮感。

記：對自己在樂壇成績點睇？有想過退休一日嗎？

李（又笑）：以我嘅條件仲唔算幸運！比上不足比下有餘，如果今日埋單計數，我得到嘅比我付出多，我諗住唱到老，除了做歌手，我仲識做乜呀？依家家庭負擔、責任又大，我仲要努力搵食，有唱片公司簽我、仲有歌迷想聽我唱歌，我都會繼續唱做好份工。

Make up：A

Hair：AB

Wardrobe：Marc by Marc Jacobs

場地：Hotel LKF

文：音樂組　攝：秦健輝