寵壞你：林熹瞳大讚英勇BB貓
有「怪談女」之稱的林熹瞳（Rachel），本來是個愛狗人士，但最終卻「過底」成為貓癡一分子，她與家中兩隻愛貓的故事，本身就是一齣《怪談》。
Rachel抱着兩隻心肝寶貝說：「呢兩隻貓，灰白色嗰隻叫ＢＢ貓，男仔，就嚟七歲，銀色有虎紋嘅叫斑斑，女仔，就快六歲，佢哋係兩公婆，我由佢哋細個養到依家，但中間停過兩年，因為之前同前男友分手，佢話要攞去養，但後尾又話唔再養，要拎佢哋送畀人，我唔捨得，堅持攞番，一直養到依家。最難忘係幫斑斑接生，望住斑斑成晚叼住啲ＢＢ行嚟行去，連我都唔畀走近，好保護自己啲仔女，不過好可惜，原來我前男友同我分手後，拎咗斑斑啲仔女送畀人，拆散咗佢哋一家，如果我喺度一定唔會畀佢咁做！」
或者是自責間接令斑斑骨肉分離，Rachel更加愛錫ＢＢ貓兩公婆，她說：「好多時我出埠做嘢都會打電話返香港，叫媽咪畀兩隻貓聽，一得閒我又會買好多零食畀佢哋，仲會帶佢哋出去沖涼，不過ＢＢ貓太錫佢老婆，次次都企喺斑斑附近唔畀人抱走佢老婆，寵物店職員試咗成個鐘都搞唔掂，結果沖唔成！其實ＢＢ貓好英勇，以前我同男友嗌交，ＢＢ貓會喺我前男友側邊猛嗌，好似喺度鬧緊佢咁！」
豐富愛貓生命
Rachel亦都因為ＢＢ貓善解人意的靈性表現而對貓改觀，她說：「喺我養ＢＢ貓同斑斑之前，我冇諗過貓會好似狗咁黐人，我去到邊，佢哋都會陪我同等我，好似狗一樣咁黐身，但到我要做嘢唔得閒照顧佢哋，佢哋又變得好獨立。（除咗短暫分開，有冇諗過佢哋可能終有一日會離開？）其實之前養過賓尼兔八年，最終佢老死，養貓當日我都同自己講做定心理準備，任何生命終有一日都會離開，但我會畀最好嘅嘢佢哋，豐富佢哋嘅生命，更加珍惜相處嘅時光。」
清場 貓媽需要安全感
能與愛貓一起迎接小生命來臨，的確令人難忘，有些事情需要注意：倘愛貓是頭一次做媽媽，盡量清場，讓貓媽媽更有安全感。一般的貓媽媽都可自行應付整個生產過程，貓主人事前可預備棉花、廁紙等清潔用品，過程中可在旁看看有甚麼可幫忙，例如協助剛出生小貓清理鼻及嘴，但一般來說，貓媽媽有強烈的保護骨肉意識，除非貓媽媽需要幫忙，否則旁觀即可。
當然，任何事情都應量力而為，詳情可請教專業及有經驗人士。
文：影視組