任達華變海南大使
任達華前晚在慈善晚宴充當旅遊大使，向荷里活男星曉格蘭特力sell中國遊。華哥大讚曉格蘭特健談：「佢好幽默，我哋邊飲酒邊傾偈，我介紹佢去中國旅遊，話佢知有咩地方必去。佢話之前行紅地氈見到一個着紅裙女仔好靚，又話好鍾意欣賞女性雙腳。（佢有冇讚張曼玉靚？）我冇聽見。」華哥續說：「我又同基斯頓史利達無所不談，仲交換咗電郵，我好似旅遊大使咁。（想取代成龍？）我係海南島大使架！」
華哥亦不忘向老婆琦琦隔空示愛，表示之前着裙行紅地氈，是想表達希望下次由太太打波，他就幫手湊小朋友，有此一日便完美了！
而同樣在晚宴上滿場飛的曾志偉，即使移師高爾夫球場亦一樣大受歡迎，被大批球僮簇擁着，爭攞簽名及要求合照。