Yumi轉型入屋封胸避戰
對於DaDa出月曆來勢「胸胸」，同為o靚模的尹蓁晞（Yumi）表示今年不會出月曆：「公司想我慢慢轉型唔性感，可以拍戲、拍劇入屋啲，（封胸？）又唔會太密實，其實我都接受唔到DaDa咁大膽，我冇佢身材咁好嘛！」
為配合萬聖節，晒長腿的Yumi與戴夢夢早前到訪萬聖節主題餐廳，更被「惡鬼」嚇到走夾唔抖！穿上短裙騷長腿的Yumi與師弟鍾一憲（Jason）和夢夢三人齊齊走進餐廳的「陰森電梯」，鬼馬的夢夢突然轉身大叫，嚇得另外兩人彈起！不過其後他們遇上「真鬼」，Jason即拖着受驚的師姐速閃護花，場面搞笑。
此外，關楚耀、陳柏宇及組合HotCha等前晚出席「有冇搞鬼錯」萬聖節活動，眾歌手齊齊以「鬼樣」贈興，大會安排真人扮演的超像真暴龍現身，嚇得HotCha依嘩鬼叫！關楚耀透露萬聖節已約朋友外出嚇人，但不會特地相約舊愛衞詩：「去到見到就見啦！」而鍾舒漫前晚身穿tube-dress模仿瑪麗蓮夢露，與農夫、樂瞳、狄易達及王梓軒等歌手出席「時時想聽老友鬼鬼音樂派對」，她說：「萬聖節唔一定要扮鬼嚇人，扮吓人物都可以好開心。」
