Da Da萬聖節派糖曆誘粉絲
「百果園咪神」陳靜（DaDa）趁萬聖節送大禮，大派誘人「sweet」，2011年超激內衣月曆照曝光！首次拍內衣照的她使出趴地及趷籮等誘惑甫士，雖慘遭「千層乳貼」整損巨咪，但仍大呼值得！為替月曆造勢，DaDa識做地扮可愛南瓜妹陪粉絲「應節」，眼見DaDa來勢「胸胸」，曾是寫真對手的o靚模Yumi竟自稱要封胸轉型，拒絕正面「交峰」！
「百果園咪神」陳靜（DaDa）的月曆打正旗號賣大包，以52個百變造型陪粉絲度過明年的52個星期，多個性感造型相繼曝光，走勢凌厲，「有聲有畫」，在o靚模界先聲奪人。
DaDa趁今日萬聖節，還向粉絲送大禮，首次穿自選內衣示人的她公開三款超激的月曆造型，雖然伊人拍攝初期表現怕醜，不時左遮右掩，但後來她成功克服心理關口，愈影愈順，還豁出去狂擺超誘惑甫士。
冶艷甫士典床典蓆
戴上Bob頭假髮的DaDa亦煥然一新，穿上全黑喱士內衣谷出「警鐘胸」，瞓身擺出S形甫士，冶艷非常，有別於一貫的純情look令人眼前一亮。而另一款粉紅色內衣照中，她趴在床上趷籮，輕咬喱士手襪，朱唇微張兼典床典蓆，同樣令人血脈沸騰。為滿足不同粉絲，DaDa在另一款月曆中穿上白色小背心騎單車，大賣青春性感。
DaDa早前到墾丁取景時，一連六天狂黐乳貼，因而被「千層乳貼」嚇怕，她說：「我都數唔到帶咗幾多盒乳貼過台灣，日日都黐三、四層乳貼，好似『千層乳貼』咁，第一日搣乳貼就整損咗皮膚，紅晒好慘，原來要用濕棉花整濕乳貼先好搣。當時要忍痛照拍，但見到靚相都覺得抵番。（點救番巨咪？）搽多啲Cream，等佢快啲好。（幫巨咪買保險？）好似有好多條款，唔係咁易買到，如果下次再狂黐乳貼，會要認真考慮買！」DaDa表示月曆照已是其性感底線，她還拍攝以床單半掩股的照片，不過是否刊出該輯露股照仍屬爭議階段，她說：「我覺得臀部唔夠靚，腰以下都唔係咁敢騷。（自覺最性感甫士？）咬手指、嘴唇微張同做出無知嘅眼神，我今次都有做晒呀。」
日做夜做終熬出病
雖然DaDa的應節艷鬼月曆照未曝光，正在上海拍新片的她孖實同門的「翻版大S」李莉琳（Liz）扮嘩鬼，陪粉絲歡度萬聖節。DaDa還分享其撞鬼經驗，她說：「我極之細膽，同朋友去鬼屋都一定攬實佢哋，有次玩完出番嚟之後我講番見到啲乜，先發現我見到啲佢哋見唔到嘅嘢，真係嚇到尖叫。」忙於在上海及香港拍兩套新戲的她熬出病來，真令粉絲心痛，她說：「我隻眼有少少發炎，靠意志力捱到底，依家日日食維他命C增強抵抗力囉！」
文：專案組