徒弟唔敢問師傅 曹永廉：見紅人更紅
敖嘉年血濺K場被人以酒杯「車」爆眉骨，事件傳出後震驚娛圈，藝人亦紛表意見。
陳敏之：「同敖嘉年做過好多活動，同冼灝英亦有合作拍劇，冼師傅好好人試過有次我隻手麻痹，佢即刻幫我按摩。我會SMS敖嘉年問候吓，陰功嘞！傷喺面度，做呢行靠塊面搵食，希望唔好留疤，希望佢哋只係個誤會，飲酒真係要小心啲。」
黃嘉樂：「我都係冼師傅嘅徒弟，師傅為人心地好，又肯幫人和愛錫徒弟，佢對嘉年都好好。（會問候師傅嗎？）我會打電話畀佢，但等件事丟淡咗先。」
陳志健：「我跟冼師傅學咗幾年功夫，尋日我都有同師傅練功，雖然知嘉年遇襲件事，作為徒弟師傅冇表示，我當然唔方便問，又唔知咩事。（佢哋有恩怨？）我入嚟練功已唔見嘉年，總之師傅對我哋好好，嘉年係同事我都唔想佢有事。」
徐子珊：「聽到呢件事覺得好愕然，同嘉年係好朋友，聽講佢縫咗針冇事。今次見紅可能係好兆頭，攞男配角獎就更有信心啦。」
曹永廉：「我唔知佢哋咩關係，但覺得兩個都係好人，相信只係酒後失控，希望大事化小啦！不過嘉年見紅之後可能更加紅！」
謝天華：「係咪真架？係咪同冼師傅爭唱歌呀？我同佢兩個人都合作過，兩個都好斯文，唔似容易動手腳嘅人，好愕然囉。希望嘉年快啲好番，件事快啲平息。」