肥媽：女仔點可以冇經理人？
大部分藝人都由經理人幫忙揀job、接騷、追酬勞，若無經理人「撐腰」如無主孤魂，被騙酬金甚至惹來自身危險。
肥媽：「自己出面接job好危險o架，可能同對方又冇交過手，又唔知人哋係咩人，所以畀經理人呢十個八個百分比佣金真係唔少得！呢啲錢係要畀人賺，經理人都唔容易o架，要幫你睇清楚條文，如果唔係去到唱完歌又要陪飲酒點算呀？作為藝人尤其係女仔，有時點樣去搵人收錢？其實我同韓君婷都好熟，佢可以搵我幫手o架！」
李蕙敏：「通常會簽合約同先收一半或以上訂金，最重要係有相熟agent（中介人）接洽，初出道時我唱幾場騷計平啲，結果唱完一場就賴我有問題，畀一場錢打發我走。試過有人搵我去非洲唱歌都冇所謂，因為agent幫我確保場地和主辦機構冇問題，收足錢就出發。」
公關及製作公司老闆娘姚樂怡：「我通常收晒錢先做，最少收一半訂金，出場前收埋尾數先開始演出。（韓君婷被騙點睇？）警惕其他人唔好再中計，唔好破壞其他正經接job公司嘅聲譽。我有幫其他藝人接騷，雙方會傾好晒先，藝人一定收晒錢先，即使喺香港做商場騷，兩個月後先找數，我公司都會先畀錢藝人。即使話簽合約，我仍覺得收齊錢最穩陣。」