Baby蜜送大褸賀曉明生日
Angelababy近日與緋聞男友黃曉明秘密拍戲奉旨拍拖，縱使舊愛陳偉霆（William）和阿Sa愛得高調，但同樣正在蜜運的她亦將戀情地面化。昨日剛返港的Baby已急不及待為曉明揀選新裝作生日禮物，期間甜蜜電話更不離手，恩愛程度不下於「陳蔡戀」。
早前Angelababy舊愛William與阿Sa竟一反常態承認拍拖三個月，而且二人還不停在微博傳情，Baby更因忍不住在網上回應「三個月」之說，掀起fans在微博罵戰。雖然舊愛愛得高調，但同樣沐浴愛河的Baby與曉明亦得到fans祝福，身處內地的他們更秘密合拍《一場風花雪月的事》兼奉旨拍拖，明顯不甘示弱。
睇啱心水即打電話
前晚Baby剛從內地返港，昨日難得放半日假，即到銅鑼灣為下月生日的曉明揀選禮物。
儘管Baby只得短短時間掃貨，但連掃三個場的她只睇男裝，由於曉明經常於內地拍劇，當地氣溫比香港更寒冷，所以她主攻男裝的厚身外套，而且還逐一用手細心地觸摸質料，認真廿四孝女友。
當她睇啱心水後，即興奮地打電話，似乎要詢問對方意見，但她一拿起電話後就唔捨得收線，而且還不停地甜笑，好明顯是與曉明談心。由於Baby只顧用電話傳情，於是邊行邊講的她再沒有用心揀衫，行完一間又一間都係空手而回。
男fans門外等女神
昨日身穿短褲長靴的Baby已經換上流行秋裝，加上誇張的紅嘴妝，所以掃貨不消十分鐘已有兩班男fans在門外等候「女神」出現。雖然Baby正用電話甜蜜傳情，但心情靚爆的她亦對fans有求必應，任影唔嬲。
由於人群愈來愈多，Baby助手才上前替她解圍，期間記者上前問Baby是否揀禮物給即將生日的男友黃曉明，她只甜笑回應，其助手亦搶答說：「難得佢今日唔使拍戲，你哋畀佢行下街啦。」其後Baby亦禮貌地保持微笑，趕快坐的士離去。
Baby日前在深圳被拍到與曉明拍戲兼撐枱腳，其經理人Kim只說：「拍戲嘅事要保密，佢哋食飯就唔回應喇。」
文、攝：專案組