福祿壽準視帝后逐個寸

盛傳將賣盤予四叔李兆基長子李家傑的無綫，昨晚在將軍澳電視城舉行亮燈儀式，除黃宗澤、楊怡、鄭嘉穎、廖碧兒缺席外，全台當家花旦、小生可謂大晒冷，視帝、視后大熱黎耀祥、陳豪、鄧萃雯及佘詩曼企正頭排正中位置，而憑《超級巨聲》彈出的巨肺林欣彤亦極速上位，短短日子已殺上頭排，可見獲無綫寄予厚望。

鄧萃雯昨晚雖以透視裝示人，胸前若隱若現，不過並未獲厚待，仍與其他視帝、視后候選人一樣，慘成被玩對象，被「福祿壽」王祖藍、李思捷及阮兆祥笑指：「黎耀祥入超市唔買嘢，只顧同師奶傾偈，佢short咗；陳豪冇同一線女演員傳緋聞（暗指其緋聞對象不是一線）；鄧萃雯唔會將個獎交畀人，佢交畀神；佘詩曼唔係人，係佘」。

福祿壽說：「啲對白梗係自己度，邊有得跟稿，唔驚有人嬲咩，幫緊佢哋平反至真，佢哋不知幾開心，完全唔覺有人唔開心喎，台慶邊個敢黑口黑面呀！」

阿姐與六叔來來回回吻別多次，顯得依依不捨。	「福祿壽」王祖藍（左起）、李思捷及阮兆祥既反串又寸嘴，笑爆全場。	佘詩曼盛裝出席台慶亮燈儀式。
鄧萃雯「開窿透視」，保守中見性感。	林欣彤在亮燈儀式大獻歌藝，可見極受公司重視。	黎耀祥開腔唱兩嘴，以證歌影視同樣有料到。

林峯被嘲chok樣

林峯對於被福祿壽笑「chok樣」，他說：「冇所謂，佢三個唔係第一次玩我，我都忍唔住笑，仲問人咩係chok樣，我試過唔夠瞓去canteen，個收銀阿姐叫我唔好放電，話『放電都要畀錢』，我做乜樣我自己唔知o架！」

對於六叔有可能是最後一次出席無綫台慶，阿姐說：「都未知會唔會發生，六叔精神過舊年，出年都想見到佢，佢身體健康，我就開心。」鄭裕玲說：「舊年都以為係啦，公司方向唔輪到我哋諗，唔理啦！」黎耀祥及惠英紅不捨，但小紅說：「佢決定得，一定啱！」

文：影視組