微博藝人求自保 阿嬌虛驚激氣
近年不少藝人紅星瘋狂玩微博，將近況與粉絲分享，其中鍾欣桐、梁詠琪和余文樂是高用量的本地微博藝人，對於健仔微博被黑客入侵盜用，大感震驚。
鍾欣桐（2,064,293萬人、全國第15位，香港第2位）：「睇到留言之後嚇一跳，好擔心佢同張茜嘅情況，我仲即時SMS畀阿Sa（蔡卓妍）同恬妞，問知唔知乜事？最後證實係虛驚一場，好激氣！但又好在全部唔係真，盜取人哋微博同埋發布咁嘅嘢，非常唔啱。但我唔會唔用微博，惟有自己睇實啲。」
梁詠琪（1,838,679萬人、全國第18位，香港第3位）：「啲人好無聊，咁樣話Dicky真係大吉利是！佢哋係咪以為件事好得意？我睇到有人轉發呢個消息，已經知唔係真。我唔認識電腦，惟有check密啲，一個月改一次密碼。」
余文樂（841,106萬人、全國第67位，香港第7位）：「同事有話我知發生乜事，後來知道係惡作劇。講到防範，新浪嗰邊教過我唔好用公眾電腦上網，每次用完要logout，我多數用手機及個人電腦上網，又經常轉換密碼以策安全。」
