劉浩龍嚇到喊 拉姑：假得好！
梁漢文（Edmond）新歌《中鋒》MV大打友情牌，邀得圈中廿多位好友做「串星」，包括老友張衞健（Dicky）、蘇永康等，對Dicky的微博遭黑客整蠱，Edmond說：「Dicky打畀我先知，大家商量後，即刻幫佢留言澄清，唔明點解啲人做埋咁傷害性、損人不利己嘅事，係幾黑心。（Dicky得罪人？）佢份人唔會，中間發生乜事唔知，希望唔好再出現咁嘅事。」他不怕微博密碼被盜，因只得他與太太知道。好友蘇永康前晚看完衞蘭演唱會，當晚親眼目睹健仔、許志安生勾勾打枱波！他不開微博，就是不想這些冇質素的人，搞出無聊事。
Dicky死黨草蜢，蔡一傑得知事件後說：「微博係一個平台畀大家互相溝通，啲人咁做係唔好心地，尤其呢啲唔講得笑，唔係單玩主人翁，係令愛護佢嘅粉絲、家人、朋友、老婆都嚇親擔心，好賤格，希望啲衰人唔好再搞鬼。」
狄波拉是Dicky契媽，身在外地的她聽到Dicky被整蠱患重病，緊張追問孰真孰假，當得知Dicky平安無事即鬆一口氣說：「嚇死我啦！呢個世界成日有呢啲無法無天嘅嘢，當消災囉，凡事我會諗有啲乜唔好，好嘢就會嚟，多謝你話我知係假，假得好！」謝霆鋒沒有玩微博，他從助手及老竇（謝賢）看到微博後告知他，希望搞惡作劇的人別太無聊。
另一好友劉浩龍竟被嚇到喊：「當時好驚，唔敢打畀Dicky，打畀吳國敬、梁漢文又搵唔到，心諗事有蹺蹊，愈諗愈驚，真係嚇到喊呀。」後來得知是惡作劇才安樂去睡，但他聲言會繼續用博微，沒有必要為一個衰人的惡作劇而剝削與朋友、粉絲的溝通平台：「微博可以唔使認真玩，但玩到咁大就梗係唔得啦！」孫耀威則說：「嚇死人，還好是假的。」
