阿Sa拒錫啖 William未過試用期

阿Sa跟William前日正式承認「姊弟戀」拍拖三個月，身在鄭州的兩人前晚急不及待於微博留言分享喜訊，阿Sa說：「我現在很開心、很幸福，之後的路就交給上天來安排吧！」而William亦稱會努力令阿Sa開心快樂，得到過萬人留言回應。

拒絕當眾「錫啖」

一對戀人昨午一點飛返香港，吸引超過半百傳媒到機場採訪，戴上黑超的阿Sa神采飛揚，全程甜笑示人，原先拒絕接受訪問的他們被記者重重包圍，最後應要求企定定影相，William主動搭住阿Sa膊頭，關係盡在不言中，現場有人起哄要求「拖手」、「錫啖」時，阿Sa立即彈開大叫：「唔係呀嘛？」然後拍拍心口離開。

阿Sa邊行邊接受傳媒訪問，對於前夫鄭中基承認新戀情，阿Sa說：「如果係真，我就祝福佢！（視William係結婚對象？）搵工都要試用期啦，（情侶檔工作？）吓？盡量唔好啦，咁得人驚，最緊要輕輕鬆鬆、開開心心、正正常常。」William表示毋須更改身上跟Angelababy的「愛的紋身」，問到公開與阿Sa的戀情後會否擔心造成壓力？他說：「我相信有足夠力量去承擔，呢兩日得到好多人嘅祝福，返嚟要多謝咁多位藝人朋友，大家祝福我啦！」隨後二人各自登上保母車離開機場，阿Sa先到銅鑼灣的錄音室，再返到灣仔的英皇辦公室，問到鄭中基知否她拍拖的消息？阿Sa說：「報紙唔係寫晒咩？」其後返回跑馬地的寓所休息。

阿Sa被半百傳媒追問與William的姊弟戀。

William和阿Sa眾目睽睽咬耳仔，愛得癡纏。

隱瞞婚訊好辛苦

此外，William及阿Sa昨早接受查小欣《巴巴閉邊個夠我查篤撐》長途電話訪問，William坦言心情緊張又興奮，他說：「大家都有啲經歷，與其隱瞞不如公開更加好，（認識七年先撻着？）我同佢性格好似，當我唔開心大家都有傾過偈，加深大家認識，我最欣賞阿Sa個人同個心，死啦，好肉麻添！」

阿Sa坦言之前曾經隱瞞婚訊非常辛苦，希望今次公開可以輕鬆啲，好似平常人一樣拍拖食飯、睇戲，她說：「佢令我改變好大，個人放鬆好多，唔咁執着，唔再轉牛角尖。（姊弟戀？）好多嘢都需要勇氣，唔關姊唔姊弟戀事，人大咗覺得最緊要開心！」

採訪：音樂組