福祿壽攞硬最佳主持

無綫節目《荃加福祿壽》收視及口碑甚佳，四位主持汪明荃、王祖藍、阮兆祥及李思捷施展渾身解數，扮鬼扮馬發放笑彈。據知，他們之前宣布會舉行的演唱會，現決定於十二月四日假新會展舉行，暫定舉行兩場，之後更巴閉到搞世界巡迴演出，包括美加、澳洲、新加坡等地。

汪明荃盡量度期

由於四人實在太受歡迎，為增添台慶月的歡樂氣氛，無綫已決定錄影四集《荃加福祿壽》特備節目，於台慶月十一月十三日起一連四星期播放。如此造勢，相信十二月初台慶頒獎禮的《最佳節目主持》獎項，亦穩袋他們手中。

左起：李思捷、阮兆祥及王祖藍扮嘢大受歡迎，實行向歌影視發展。（資料圖片）

三子在節目中經常反串演出，相信拍劇扮女人必定「冇走雞」。

另外，本報收到消息，指無綫明年落實為他們開拍電視劇及電影，劇集更決定於明年初開拍。記者昨日致電汪明荃求證，她說：「乜開電影咩？唔係淨係開劇咩？我唔清楚喎！如果係就真係開心，始終之前節目都好受歡迎。（你啲檔期咁難度就唔就到？）都要傾吓先，不過自己有期都會盡量去做。」

必定扮視帝視后

祖藍亦謂：「台慶特備節目我哋都會即刻開會傾，今次都想玩得癲啲，睇吓到時搵唔搵到啲視帝視后、有份提名嘅花旦小生一齊錄影。（扮佢哋？）梗係唔少得啦！」提到開拍劇集，祖藍笑指阿姐心急叫他們一起度橋，希望擦出新火花。阮兆祥亦坦言因為觀眾對他們有期望，故不想有任何失誤，必定會全力以赴。阮兆祥謂：「其實來年我哋都有好多新計劃同搞作，希望樣樣都做得好成績。」

文：影視組