家族有聽障問題 謝安琪慶幸愛子冇遺傳
歌手謝安琪（Kay）前晚舉行慈善音樂會，她表示家族成員有遺傳性聽障，幸好她跟囝囝都未有影響。
Kay前晚跟孫耀威（Eric）獲邀為慈善基金舉行《慈善聽唱會2010》，宣揚聽覺保健的訊息，不過二人默契認真麻麻，甫出場合唱《會過去的》時不停甩嘴，雙雙自嘲帶過，其後Kay獨唱國語歌時又因忘詞而要求重新再唱，認真失魂！
擔心爆肺方大同
Kay自爆家族有部分成員患有遺傳性聽障問題，所以特別支持有關活動，她說：「有個表妹一隻耳仔完全聽唔到，另一隻都好弱，細個我同佢一齊學鋼琴，另一個親屬更加因為聽障影響埋說話能力，所以我知道聽障人士生活好多唔方便！」她表示幸好自己跟囝囝張瞻都未有遺傳到聽障的疾病。提到四度爆肺，她說：「我都好擔心方大同，我就話肥尸大隻頂得住，佢呢啲瘦如紙咁，最緊要都係多啲休息，我呢兩年都好番好多。」
Eric抗日激減8公斤
久未公開露面的Eric變得激瘦，他表示近來到橫店拍劇，為演抗日青年激減8公斤，他說：「我由72公斤跌到落依家64公斤，但我目標係60公斤，希望做到皮包骨嘅感覺，（女友陳美詩心痛？）佢未見到我真人，不過期間都有視像傾偈，做呢個騷畀機會我返香港見吓屋企人同女朋友。」
文：音樂組