Eason向李家傑自薦：不如收購我
陳奕迅（Eason）貴為天王級歌手，昨日向李兆基長子李家傑自薦，奢望對方出3億天價收購自己，還坦言如果自己是邵逸夫，絕不捨得賣掉無綫。
Eason昨日出席澳門演唱會記者會，剛跟前輩歌手露雲娜合唱《講男講女》的他，希望請對方做嘉賓：「佢好想唱歌，鬧我挑起佢條筋。」問有冇想過跟同經理人公司的王菲合作？他笑說：「同佢唔係好熟，佢好忙，我估佢6點食晚飯，8點瞓覺。」
自嘲歌酬5萬盧布
身為四大唱片歌手的他，對於傳李家傑傳斥資90億收購無綫，Eason笑說：「不如收購我呀。（幾錢？）2、3億。（你都賺到啦？）歌酬5萬咋。（美金？）係盧布，哈哈。（收購你做CEO？）唔係，可以用我影響力去回饋社會，不過我都係發夢啫，其實我唱歌為興趣。」對於六叔邵逸夫撤離無綫，Eason坦言：「如果畀我，無綫由零開始，依家有咁成績，真係唔捨得賣。」
而同場的王菲經理人陳家瑛，對王菲上海騷門票被炒至6,999人民幣，她說：「梗係唔好啦，開心佢咁受歡迎，但替買飛歌迷心痛。」
徐濠縈瞞女兒出埠
另外，Eason老婆徐濠縈已飛往巴黎為其時裝店入貨，她坦言驚女兒康堤會喊，故每次出埠都要瞞住女兒，只說去買朱古力，但現在女兒漸大已行不通。無論她飛到哪裏，女兒掛念她便打給她，試過最貴一星期電話費達一萬元。她表示女兒講明不介意爸爸陳奕迅外出工作，但介意她工作。
採訪：音樂組