祖兒雙眼見紅踎低頭暈

祖兒昨日以代言人身份率領師妹鄭希怡（Yumiko）、師弟洪卓立出席百老滙新店開幕，大會即場宣布祖兒冧莊接拍第十一個廣告。穿上Plotz連身裙的祖兒，被問到過去十次的廣告酬勞是否達千萬？她笑說：「報紙上係咁寫，實際就自己知，唔係咁多，不過每次酬勞都有遞增。」

鄭希怡愛上拍劇

將於十一月舉行個唱的祖兒坦言拍完新廣告才能「閉關」，她說：「真係做到金睛火眼，冇時間休息。」記者指她雙眼布滿紅筋，祖兒笑謂：「之前幾日真係踎低起身見頭暈同埋失眠。（食安眠藥？）冇食過。」

祖兒與「太空人」齊齊宣傳新店開幕。

洪卓立充當攝影師為師姐影合照。

剛由內地拍完電視劇的Yumiko表示愛上拍劇：「過兩日又飛上海拍另一套。（搵『人仔』？）好開心呀，雖然拍劇辛苦同時間長，但吸引之處有好多。」問到化妝師男友Andy有否到內地探班？她說：「冇喎。」曾在台灣拍劇而患肺積水的洪卓立隨即搭訕：「我都想拍內地劇。（你應唔應付到？）今時今日唔得都要得。（等錢使？）個個都等o架啦。」

另外，有雜誌報道祖兒御准《超級巨聲2》冠軍林欣彤以四百萬簽約英皇，祖兒對此否認：「我冇聽講過，亦冇權利去揀人。（點睇林欣彤？）佢唱歌好有heart！」

文：音樂組