嘉玲千五萬閃鑽撼贏冰冰

電影《狄仁傑之通天帝國》昨晚舉行首映，片中演員劉嘉玲、李冰冰、鄧超、楊受成伉儷、利雅博、楊諾思、導演徐克等亮相，英皇鐘錶珠寶董事總經理楊諾思代表英皇鐘錶珠寶上台向演員們頒發紀念品。

老公電話撒嬌

嘉玲昨晚以一身黑色長裙，配以英皇珠寶贊助共值一千五百萬元的耳環、戒指、頸鏈，珠光寶氣登場，成為全場焦點。嘉玲被問到老公梁朝偉沒法來捧場有否失望？她說：「佢喺內地拍戲嘛！（冇偉仔陪過中秋？）當然，都習慣咗各有各忙，成日都係咁。（偉仔叫你去探班？）我哋從冇要求對方探班，不過我都想去，睇佢打成點。（擔心佢受傷？）都有，佢成日受傷，（佢喺電話中嗲你？）咁都好正常啫！（叫偉仔睇你嘅戲？）佢乜戲都睇，睇好多戲。」

不過，嘉玲說基本上偉仔不會給她評語，但這部戲她好想偉仔給評語，她說：「因為爭議性大，我冇票房壓力，因為已經做好。（行頭贏冰冰？）唔係比嚟比去嘅！（曼玉喺威尼斯電影節冇睇你套戲？）你哋仲話佢會睇，（失望？）唔會，佢肯定係有嘢做至嚟唔到，私下同佢都有接觸，都熟嘅！」

英皇鐘錶珠寶董事總經理楊諾思頒發紀念品給劉嘉玲。

左起：徐克、劉嘉玲、李冰冰、鄧超與泰迪羅賓一齊睇首映。

冰冰信心十足

李冰冰在珠寶贊助方面，雖落後嘉玲七條街，但她謙稱：「我未見到嘉玲姐，未知佢珠寶贊助係幾多，但拍攝時嘉玲姐教咗我好多嘢，陣間見到佢，我會再多謝佢，對於票房我有十成信心。」

文：影視組