楊千嬅出席潮店慶功典禮，鼓勵年輕人創業，但她自認做生意唔叻，曾經開過二手店的她，最終蝕讓離場：「做生意真係力不到，不為財。」千嬅表示將來再做生意，寧願買舖位出租作適當投資。
千嬅又表示不會跟老公丁子高一齊工作或搞生意，因為大家性格、要求不一，她說：「即使佢搵我做嘢，都係經公司搵，怕麻煩爭拗。」她何不考慮出錢，由老公出力做生意？她說：「都唔可以，佢係大男人，唔鍾意我干預佢工作，呢啲亦係兩人相處之道。」同場的小儀最近傳出與男友分手，活動上她表現專業，未見情緒受影響。
