克勤向TVB借勢抓撈
陳志雲自被廉署調查至今一直停職休息，盛傳昨日他正式復工，吸引大批傳媒到將軍澳電視城守候，可惜辦公時間內一直未見其蹤影，無綫電視外事部副總監曾醒明表示：「冇收到公司消息話佢會返工，據我所知佢聽日仲要去ICAC嗰邊報到，應該過多幾日先明朗化。」
自薦上《超級巨聲》
身為志雲好友的李克勤坦言跟對方經常閒話家常，但很少提及工作。提到志雲大師復工的消息，克勤面帶委屈說：「真係咩？陳志雲都返TVB喇，幾時到我哋？」他又自爆前晚收睇《超級巨聲》時好恨上節目：「呢個節目啱晒我做啦，主持、評判或者表演嘉賓我都做得，四大唱片藝人夠晒成個騷啦！」至於志雲的「愛將」鄧健泓（Patrick）、陳豪和鄭嘉穎均表示不知道志雲「復工」，Patrick說：「如果真係復工都戥佢開心，佢係個好叻嘅人，去邊都會有好發展！」而嘉穎則表示志雲依然是無綫總經理，返工都是正常事。
另外，克勤新碟將於15日推出，他邀請了好友林海峰設計唱片封套，他笑言十足似《鐵窗邊緣》中，罪人告解的情節。
採訪：音樂組、影視組