阿嬌忙爆 演技未去盡
曾與曾志偉、鍾欣桐（阿嬌）、張家輝等多位港星合作的電影導演彭浩翔，即將踏入導演生涯第十年。當年曾教人如何在全無人事關係下，在香港影壇開戲做導演的他，今日開題目大談與志偉、阿嬌、家輝合作逸事，三人令他欣賞之處，有請。
對於一個導演而言，第一齣作品可能贏得僥倖，第二齣作品才是定生死的關鍵。彭浩翔在第二齣執導大銀幕電影《大丈夫》，與大卡士曾志偉合作，他說：「記得拍嗰陣撞正歐洲國家盃，開工好難叫人埋位，個個都想睇波，志偉更加唔使講，佢講得最多嘅係『你拍咗其他人先』，結果成套戲我幾乎都係跳拍！」
志偉瞓住開會
志偉有一樣「技能」最令彭浩翔佩服，他謂：「同佢開會傾戲，佢可以講講吓瞓着，我哋通常都會由得佢瞓，繼續開會，點知志偉會突然醒番，仲可以接得到我哋講咩！我好羨慕佢呢種『零存整付式』嘅睡眠，我諗志偉係訓練有素，佢大部分嘅睡眠應該都係唔正經。」
與志偉這種大忙人合作後，彭浩翔在《公主復仇記》中再遇上當時得令的阿嬌，他說：「我有張阿嬌喺拍戲現場攰到瞓着嘅相，佢個樣真係攰到好似暈咗咁，我都唔忍心，咪畀佢瞓多陣。雖然佢鏡頭外好攰，但埋位即刻生猛番。香港其實都有好戲嘅演員，但佢哋太多演戲以外嘅工作。我當然想演員淨係拍戲，但呢個係香港娛樂圈生態問題。深入去睇，係源自香港人嘅不安感，有錢搵咗先，做多幾份兼職。所以藝人幾多棲係冇問題，只要唔好人到精神冇到就得。」
欣賞家輝勤力
彭浩翔對勤力的演員特別有印象，最難忘《出埃及記》的張家輝，他說：「我雖然喺亞視做過幕後，但未遇過張家輝。記得喺《出埃及記》，佢有場戲要幾頁紙對白直落拍晒，家輝背熟晒，我戥佢唔抵，辛苦一大輪，好多人以為係剪接，我見親都同佢講，你話畀人知場戲係直落拍，但佢冇咁做。後來見佢終於攞影帝，都戥佢開心。」
文：影視組 攝：林楠