陳嘉桓喊住練功打出頭

陳嘉桓雖然入行時間很短，但她已接了多個廣告及電影，繼電影《葉問前傳》後，Rose將參演一齣古裝電影，並要在內地逗留兩個月，新戲會跟內地女星黃奕再度合作。問Rose覺得黃奕如何？她表示：「佢好好人，之前我哋拍《葉問前傳》嘅時候，經常都會圍埋一齊傾狗仔經，因為我同佢都有養狗，會有共同話題。」

紮馬都有問題

Rose兩年前開始練功夫，師傅為冼國林，因Rose冇功夫底子，所以練習格外辛苦，Rose說：「因為我啲筋骨好硬，所以初初練嘅時候，好多動作都覺得好困難，記唔晒啲功夫招式之餘，連紮馬都有問題，師傅好用心咁教我，有時都會鬧我，試過有一次師傅好緊張咁話我，我又好忟自己做極都做唔到，一路喊一路練功，亦試過練功練到返屋企匿埋房入面喊，都係忟自己做得唔夠好。」

習武前身子弱

Rose年紀輕輕便接受一連串武術訓練，雖然辛苦，但Rose覺得好處很多，最重要當然是強身健體，她表示：「我以前唔做運動，身體好弱，好易氣喘同病，但練咗功夫之後，身體好咗好多，（練功練得咁辛苦，爹哋媽咪係咪好心痛？）都唔會，佢哋仲覺得我有咁嘅機會去學習中國功夫，係一件好事嚟。」

文：影視組　攝影：秦健輝