鍾澍佳激讚鄧麗欣蜜桃半熟

擅拍喜劇的導演鍾澍佳，十多年前已主理《難兄難弟》及《美味天王》等叫好叫座劇集。其後踏足電影圈執導《九個女仔一隻鬼》、《七擒七縱七色狼》及《72家租客》等，他自言一定要與時並進：「做喜劇導演唔可以Out，唔通仲用廿年前嘅Gag咩？」

志偉片場一本正經

與曾志偉合作多次的佳導演透露這位百厭星其實很認真：「我係佢工作朋友，所以見親都係開會。（佢玩得好癲？）佢喺片場好嚴厲，完全唔係『獎門人』咁！更加唔會醉住開工！」

提到曾三次起用Stephy，佳導演表示她初出道時已很突出：「當時佢哋有九個女仔，個個都乖乖女，但我對Stephy最有印象，因為佢把聲好得意！」他讚Stephy當時以新人來說演技已算不錯，因角色性格有起伏又要喊，頗有難度。最近再於《72》片合作，Stephy已「亭亭玉立」，佳導演說：「佢係女人咗，但難得仲保持到一份清新嘅感覺！而且佢性格好樂觀，我哋私底下都有傾偈。（提起戀情？）冇！方力申都冇嚟過探班！」

學友祖藍至啱嘴形

張學友在《72》中的演出十分破格，佳導演表示是學友自己選擇做「衰格」的角色，很多笑料更是由他提供：「最難忘嗰場係學友扮自己唱歌，之後輪到王祖藍扮，佢哋夾晒嘴形，仲要一Take過！好犀利又好笑！」佳導演又大爆黃宗澤（Bosco）與胡杏兒的親密關係！他說：「有次我同Bosco講想搵杏兒客串一場，點知一個鐘頭後佢就出現咗，而且仲唔介意扮AV女優蒼井空，最搞笑就係有人話蒼井空真係試過呢個造型！」

抄劇難逃觀眾法眼

對於曾効力的無綫最近常被指抄劇，佳導演認為事件一直存在，只是當年只參考類型，絕不會抄劇情，而且現在網友已變得「神通廣大」：「依家啲觀眾係唔呃得！佢哋會睇到全世界嘅嘢，以前就唔係，要租碟都唔易。」

文：立影