千嬅心酸痛斥無知

楊千嬅昨日與何超蕸出席海港城舉行的「東華之友每月捐款計劃2010」，向巿民推廣每月定期捐款的計劃，活動開始前全場為菲律賓慘劇中遇害港人默哀。千嬅憶述事發當日正前往上海工作：「朝早睇嘅時候都冇諗過咁大鑊，個槍手一開始都肯放人，以為傾到，做完嘢返到酒店知道變成咁，成個人呆晒，睇到又㷫又嬲！」曾任護士的千嬅又稱眼看病逝的人亦會感心酸，何況事件歷歷在目，難免影響心情及感到受傷害。

憂陰影伴一生

對於遇害港人死後於菲律賓被開棺供傳媒拍攝，千嬅難掩憤慨說：「應該要尊重人，每個地方有不同水平，但無知嘅代價太大，日日都鬧，鬧咗咁耐都冇意思，人已經走咗！」心痛的千嬅指目擊親人離開的小朋友身心亦需要特別照顧，她說：「呢個陰影係成世，要幫佢哋搵番生存意志，唔會知個傷害有幾深。（計劃探佢哋？）依家應該畀空間佢哋消化件事。」提到頭部受重傷的梁頌學已回港就醫，千嬅即輕拍心口以示安心。

千嬅與何超蕸（左）於活動上低頭為死難者默哀。

遇難港人的屍體日前已運回本港。

更珍惜身邊人

千嬅除於微博呼籲巿民支持向遇害家庭捐款援助外，又透露老公丁子高有定期捐款習慣，問到事件有否加速千嬅的「造人計劃」，她說：「冇即刻諗，不過自己結咗婚有家庭，覺得梁太好慘，情緒係受到影響，但生活、工作都要繼續，會更加珍惜身邊人。」

採訪：音樂組