莊思敏升胸變硬：似健康球
名模莊思敏日前公開承認隆胸兼割雙眼皮，昨日首度穿上婚紗工作，上圍明顯升cup的她成為全場焦點。她自爆有朋友摸過她的胸部並說其感覺偏硬，像個健康球，要靠做按摩變回自然。
昨日莊思敏（Jacquelin）為「亞洲青年婚紗設計師大賽」新聞發布會擔任模特兒，隆胸後首度參與工作的她成為被訪對象。記者笑指她隆胸後果然效果逼爆，她即笑說：「梗係啦，唔係做嚟做乜？不過依家未消腫，未知個size，但都應該升咗兩個cup。（會唔會唔慣？）重咗囉，條腰會易攰。」
男友關心痛唔痛
莊思敏又謂隆胸後不少人將視線放在其上圍，她續說：「有好多朋友打嚟話想做，都有圈中人打嚟關心，（邊個圈中人？）唔好講啦，佢哋關心啫！」記者笑問男友吳浩康欣賞過其身材沒有？她說：「未喎，不過佢有叫我send相畀佢睇，（send胸部相？）唔係，因為我話對眼瘀晒，佢咪想睇，其實佢關心我痛唔痛多過個製成品。」
插o靚模胸作焦點
Jacquelin表示消腫後還需到美容院接受一個月的按摩，記者笑言何不請男友按摩省回金錢？她說：「美容院有包嘛，係售後服務。（有冇人摸過？）朋友囉，佢哋話依家偏硬，好似個健康球咁，做埋按摩就會自然番。」談到早前她批評o靚模靠胸上位，現在又自打嘴巴隆胸？她即澄清說：「我唔係針對任何人身材好，我只係針對有啲人將個胸做工作焦點，我依家身材好都唔代表要成為工作焦點，屋企有米唔代表要派米。」
文：名人組