羅敏莊反彈唔理老友
唔講唔知原來羅敏莊係歌手出身，95年佢憑住首《挑戰者》一曲成名，可惜有頭威無尾陣。最近憑住《超級巨聲》同參賽者合唱當年成名作，被倫永亮大讚後，終於吐氣揚眉。早幾日佢仲不知幾開心咁拖實老公陳國邦喺銅鑼灣行街，公然晒幸福。
嗰晚落雨濕濕，八太見到陳國邦同羅敏莊兩公婆喺商場外面避雨，期間仲惹嚟唔少途人目光，不過佢哋一於懶理，眾目睽睽下十指緊扣兼咬耳仔，鬼咁煙韌。
之後，夫婦兩人會合埋個女性朋友，就嘻嘻哈哈咁起行去食飯醫肚，不過眼見佢兩個成程路不停喺度打情罵俏，完全忽視個女性朋友。喂，知你兩個幸福啦，但都唔使唔理個friend o架。