Eason街頭棟篤笑氹死妹妹仔

陳奕迅啱啱度過三十六歲生日冇耐，雖然Eason年紀都唔細，仲做埋人老竇，但身為歌神嘅佢把口唱得之餘，原來仲好talk得，八太就有幸見識到Eason嘅「口技」，氹到班妹妹仔暈陀陀。

成枱笑到標眼水

前幾晚十二點幾，Eason同成班年輕人齊齊去大坑嘅「小甜谷」食糖水，一馬當先嘅Eason揀咗張靠路邊嘅枱坐低後，仲好有大哥風範，問齊班朋友食乜後就拿拿聲落單，之後就見Eason把口未停過，一輪嘴講到手舞足蹈、郁身郁勢，仲好似棟篤笑咁扮完呢樣扮嗰樣，最後佢仲興奮到咬晒手指。

大街大巷做Show嘅Eason，氹到同枱班後生仔女淨係識望住佢表演，成粒鐘坐定定乖乖做觀眾之餘，仲笑到眼水都標埋咁滯。照我八太就現場反應嚟睇，Eason第日就算退出歌壇唔再做歌神，都應該可以轉行做笑匠，搞番幾十場棟篤笑儲錢養老。

Eason氹到成枱後生仔女哈哈大笑。

Eason由坐低講到埋單，勁過黃子華。

掃雜糧殿後埋單

講足成粒鐘後，Eason仲同班後生仔女走去隔籬間便利店買雜糧，佢就殿後埋單找數，但係Eason個款似乎仲未講夠，成班人再圍喺街頭繼續吹水，最後傾咗成十幾分鐘，佢先捨得搭的士走人。