霍啟剛扯火冇嗒性主播

霍家準新抱郭晶晶自去年參加香港東亞運跳水賽後宣布休息一年，近日頻頻單拖出席公開活動，一向對感情事低調的晶晶，早前在西安罕有發表「恨嫁宣言」，坦承希望有一個幸福婚姻和家庭，令婚訊愈傳愈熱。

可是日前突然殺出程咬金，有傳霍啟剛背住女友與來自台灣、曾主持電視成人節目的女主播趙彤約會，兩人齊齊出席菁英會晚宴，現正身在南沙的霍啟剛接受本報訪問，直斥報道失實，而據知「剛晶戀」一直感情無變，完全不受今次緋聞影響。

霍啟剛澄清趙彤只是「朋友的朋友」，似向郭晶晶大派定心丸。 （資料圖片）

趙彤（左）與Angelababy一同出席活動，合照留念。

「好明顯係合成相」

對於被指與趙彤一起出席菁英會晚宴，霍啟剛指身為菁英會副主席，當日自掏腰包買枱請朋友食飯，而趙彤只是「朋友的朋友」，他對報道十分不滿，並說：「結果畀人寫帶女仔去Ball，我都好愕然同好憤怒，好明顯係合成相，有啲睇落仲要係三張合成一張相。」

身為菁英會副主席的霍啟剛（左），在晚宴中不停招待賓客。

傅明憲（右）當晚亦有出席菁英會晚宴。

霍啟剛愈講愈有火：「我話報道失實，根本講細咗件事，件事直情係虛構出嚟，我被某傳媒喺呢啲報道做文章，都唔係第一次，做傳媒都要有專業操守，咁無中生有去誤導讀者，對讀者好唔公平，不過相信讀者可以分辨是非，成件事係歪曲事實！」

至於當日有在場的傅明憲，力證霍啟剛並非花心公子，她說：「全中國人都知佢女友係邊個，係咪誤會咋？（識唔識趙彤？）見過幾次，但私下冇約出嚟，佢同菁英會好多人好熟，印象中佢幾nice。」

留言「小心枕邊人」

其實趙彤不止一次傳出搭上富豪第二代，今次更被指越級挑戰「國寶」，昨日其手機一直關上，不過她在Facebook留下一句「小心枕邊人」，令事件似是而非。她的經理人在電話中說：「Yedda（趙彤）今朝去咗內地做嘢，佢有打過畀我，佢話同霍啟剛一直都係朋友，大家一齊玩之嘛，（佢唔開心？）冇，（傳霍啟剛曾經陪佢北上開工？）梗係冇啦，每次都只有工作人員陪佢。」

文：專案組