黎明寸爆無綫抄橋唔認

黎明昨日獲邀為電台廣播劇首播禮擔任嘉賓，他在台上分享創意心得時，不時針對娛樂圈時弊。當主持人問黎明會否考慮發展新媒體時，他大讚電台能夠堅持原則發放正面訊息，他說：「唔似有啲電視台抄人哋日劇嘅劇本，抄完又唔認。」明顯寸爆無綫早前由林峯主演的劇集《談情說案》狂抄日劇《神探伽俐略》，身為天王級的黎明無懼無綫封殺，一於講道理痛斥抄襲行為。

而黎明又提到不少網友大彈部分唱片封套肉酸，他說：「如果大家睇唱片封套而吸引到，但入面十首歌只有一首歌係OK，咁就唔值得啦，可能索性download就算啦！」

黎明事後接受訪問，提到抄襲的言論，他說：「係因為你哋（記者）成日問我，但你哋又唔肯講真嘢，如果媒體可以講真嘢，咁就會自然流露出嚟啦！（叫人download歌？）唔係，我只係覺得如果隻碟唔好聽，只係得一首好聽，你可以合法download，非法我都冇你符，呢個係觀眾自然購物嘅選擇。」

出席戴思聰喪禮

對於戴思聰老師離世，黎明表示會出席喪禮，但問到扶靈名單時，他說：「唔好將老師去世呢件事變成一單新聞，我不嬲都唔主張，我同身邊嘅人講，如果第日我走咗，搵個人幫我撳個掣就算，唔好煩到我身邊朋友，所以呢個話題要停止。」

此外，曾是黎明的台灣髮型師陳科維，昨被指因涉嫌吸毒被捕。據當地警方調查所得，卅三歲的陳科維為了買毒品，更將台北市的三間髮型屋變賣。

採訪：音樂組