楊穎明花有主：好幸福

得與失去

所謂大樹好遮蔭，Baby在日本公司的安排下又拍短劇又設計潮流環保手袋，最近就連日本天后安室奈美惠代言廣告亦成功取代，步步進迫東瀛一姐地位。內地方面，與一線型男黃曉明傳緋聞，多得「海綿蛋糕」的推波助瀾又成功認識多位名導及台灣巨星，幾個月內在兩岸三地火速竄紅，令「香港女神」稱號又再創高峰。

憶婆婆眼濕濕

可惜成名背後，又有誰知道失去會比得着多？最痛心的莫過於失去與至親見面的最後機會。「呢3年冇咗好多同家人及朋友相處嘅時間，最深刻係今年婆婆過身，我有工作要做，唔可以即刻飛去見佢最後一面。一直我都知婆婆身體唔好，都有心理準備，常抽時間去探佢，其實原來人真係只爭一口氣，就可以再同佢講嘢，可以再同佢抱抱……」說到這裏，再堅強的Baby已眼泛淚光。

寫真背後

當Baby宣布選取充滿陽光與海灘的關島作為寫真地點時，的確叫人即時聯想到女神會穿比堅尼上陣，更期待向來守身如玉的她演繹出水芙蓉，但原來令宅男充滿幻想背後，Baby卻不只是「肉睇」上付出。「當我知道喺關島拍攝確有心理壓力，其實我一向好怕見到海水，綠綠藍藍咁浮吓浮吓，好似好恐怖，可能我睇得鬼片多。」p:Baby認真地說。

請得「香港女神」Deep V騷胸又露腰露腿性感上陣，除有一大堆名牌贊助外，要令她克服潛入水底扮谷胸美人魚的恐懼，大師級人馬攝影師夏永康應記一功。「當我見到夏永康叫助手踩佢落水底，堂堂一個攝影大師竟會為我咁做，嗰刻我真係好感動，逼自己豁出去。」來到第三本寫真，Baby指這次的賣點已昇華為深層次的「流露情感」，難怪她要「暫別」，直說：「如果第一本賣可愛少女味，第二本賣靚人靚景，咁第三本就賣內心演繹，所以相中真情流露，見證我3年成長過程。」

高度戒備

每次當傳媒提起Baby緋聞男友黃曉明時，她就算「唔講唔講」都報以甜蜜笑容，但在訪問中她就反常地即時築起圍牆，嚴陣以待的有備而戰地說：「真係唔想畀人覺得我係為宣傳，藝人要拍拖真係好大壓力，但我可以講我依家好幸福。」

雙魚座愛浪漫

當然Baby強調自己的「幸福」是從家人同朋友中感受，但深信「海綿蛋糕」亦下了不少工夫。「我係好典型嘅雙魚座，鍾意冒險同浪漫，但依家人大咗，對各方面感情都多咗份責任，覺得自己要照顧屋企人，最近鍾意聽歌劇，睇吓講佛嘅書，覺得自己心境都好老喇……」

親自解「扣」

早前Baby在微博表示因家中有「小強」出沒，令她有家歸不得，幸好有「米扣扣」仗義相助收留她。當說話發放後，傳媒即對號入座，認為「米扣扣」就是「海綿蛋糕」。她笑着解釋：「米扣扣係我一個由15、16歲就認識嘅女仔，佢簡直係我嘅大腦同左右手，幫我解決晒所有困難。每次當我有要事相求，未問我咩事就會一口答應，真係我最好嘅朋友。」