Baby晒腿踢低封胸周秀娜

今年o靚模寫真集風起雲湧，其中以Angelababy及Chrissie人氣最盛，雖然還未埋單計出誰是寫真女王，但昨日二人首度正面對撼，於同一時間同一地區舉行簽名會，Baby於各方面都獨領風騷，高下立見。

昨日Chrissie以流動車形式，於三時及五時半分別假尖沙咀海防道及金紫荊廣場進行簽名活動，同日下午三時，Baby在尖沙咀海港城海運大廈SportX舉行一場簽名會。

男子投訴警察趕車

Baby以Forever 21超短迷你Tube Dress騷靚腿會fans，除了大會預先派發的三百個籌外，周邊圍觀的fans約一千人，他們不時舉牌吶喊，聲勢浩大，大會安排十多名保安及工作人員護駕。

至於平時愛以騷胸的Chrissie昨日竟收起「胸」器，穿上黑色長裙，打扮失色，公司仍安排了六名工作人員在場維持秩序。而每場簽名會的fans人數約有百多人，比起Baby少了一個零位，最慘在尖沙咀簽名時，還有一中年男士贈興，對方以「有個阿姑阻住我行」而向警方投訴，加上被警察趕車，Chrissie無奈將簽名地點，由車上改往附近一個露天公園，捱熱坐在鞦韆上簽名，難怪她大呻：「我覺得今日着錯衫，唔應該着黑色，終於感受到大家嘅辛苦。」相比起Baby在大型商場內涼冷氣簽名，則輕鬆得多。

3:00pm 海運大廈SportX Baby首天宣傳獲大批fans撐場。

3:00pm 尖沙咀公園 周秀娜限於場地問題，fans較為失色。

否認寫真抄襲日模

雖然打扮、排場、場地及fans人數，Chrissie統統輸給Baby，但寫真銷量則不相上下，Baby表示寫真集在港的銷量已過二萬本，連中港台日在內，首印的三萬本已供不應求，她說：「上年出三萬本，今年已超過，我知銷情好好，知道有得加印。」她還風騷表示：「呢幾日都喺度賺錢，冇乜為新書宣傳。」至於Chrissie則稱寫真集已賣過二萬本，公司正安排加印。

對於二人同區交鋒，Chrissie笑言冇當佢哋係對手，似蠱惑仔爭地盤，Baby直言不會視對方為對手：「我冇心同佢爭，但唔係唔尊重佢哋。（Chrissie送舊Bra答謝fans。）我唔知，佢嘅fans應該會有感覺，我又唔係男人。」不過，談到寫真集涉抄日本名模梨花的寫真，Baby聞言面色一沉：「佢本寫真我有睇過，但我覺得完全唔似，無論感覺、造型都唔似。另外，問到緋聞男友黃曉明被指整容，Baby力撐對方只是造型問題，完全無改變。

此外，昨晚已有人在網上炒賣Baby的寫集簽名海報。

文：名人組