G.E.M.遭陳偉霆逼供嗌救命
緋聞男女陳偉霆（William）與鄧紫棋（G.E.M.）昨日以「兄妹檔」現身活動，未有留意G.E.M.與林宥嘉新戀情的William倒戈相向對「舊愛」逼供，兩人更大耍花槍，盡顯「兄妹情深」。
William與G.E.M.昨日齊齊現身活動，隨着兩人不停譜出其他新戀情，加上向來以「兄妹」相稱，William與G.E.M.未顯避忌，繼續大方糖黐豆。活動上有不少香港特色擺設，當中包括茶餐廳與雞蛋仔檔的布景，William說︰「自己一日有兩餐喺茶餐廳搞掂（冇住家飯食?）有時晚飯都係同媽咪。」
至於G.E.M.被問有否帶最新緋聞男友台灣歌手林宥嘉到茶餐廳一嘗風味？她甜到漏說：「佢好少嚟香港（之前有嚟過嘛!）下次介紹啦！」
工作後撐枱腳
之後William自爆不怕與G.E.M.再傳緋聞，已相約對方工作後聚餐，G.E.M.和應說：「我哋傳到冇人信啦!」William表示對於G.E.M.的新戀情一無所知，他說︰「唔知喎，淨係知側田、我同狄易達，係咪好out？」隨後William即追問G.E.M.：「真㗎？你唔同我講嘅？」令G.E.M.不禁大叫：「救命！」William又說會為傳媒向G.E.M.逼供，G.E.M.得戚說：「我冇所謂，你請我食飯就得喇！（咁帶林宥嘉去過邊呀？）呢個係一個秘密！」G.E.M.更順勢宣傳新碟，William大讚對方對答有進步，G.E.M.反駁說：「都係跟你學，成日帶人遊花園。」
採訪：音樂組