莊思敏越南通唱好Seafood
莊思敏今年加入才女行列，在書展推出首本旅遊書，揚言是轉型的第一步，但不會放棄做模特兒。另外，「萬寧妹妹」王允祈亦將在書展會粉絲。
莊思敏（Jacquelin）將在書展推出《潮遊越南》旅遊書，被問到點解會選擇越南這地方？她說：「我去過越南三次，好鍾意呢個地方，我想帶啲新資訊畀有興趣去越南嘅人，而今次主要介紹胡志明巿。越南最吸引我嘅係海鮮，嗰度啲海鮮又平又新鮮。」
下年或介紹祖國
被問到會否繼續出旅遊書？她說：「都想，下年可能出祖國馬來西亞嘅旅遊書，但馬來西亞太大，我雖然喺嗰度成長，但未必去過好多旅遊點，到時要花多啲時間去搵資料。」
今年書展一眾o靚模均不能舉行簽名會，而Jacquelin不在「黑名單」之列，問她之前有否擔心不能搞簽名會？她說：「一開頭冇諗過 冇得簽名，後來有聽過可能唔畀，但最後又話可以，都好開心。」
另外，被問到出書是否想轉型？Jacquelin說：「都可以咁講，但又唔會唔做模特兒，而且自己仲有其他計劃，除咗開美容網站外，依家簽咗王晶間新公司，都想拍戲，希望喺呢方面發展。」
允祈父勞氣撐女
另外，「萬寧妹妹」王允祈將推出相集《我有少少鍾意咗佢》，本鐵定於今個月24日到書展搞簽名會，近日卻盛傳簽名會將告吹，允祈爸爸表示只是謠傳：「允祈係好忙，不過點都會抽時間見fans，（驚唔驚有人學廣告用雪糕氹佢？）食雪糕有Quota，唔係要成日睇醫生。」另外又有網民力插允祈手足口病剛痊愈，不應出席公開場合，允祈爸爸勞氣地說：「允祈五月底已經好番，唔通依家仲要隔離咩？允祈雖然人仔細細，但簽名就好認真，會寫中文全名，好似繡花咁，到時亦會準備印仔同貼紙滿足啲fans。」
文：名人組
場地：Indochine（蘭桂坊）
服裝：Nine West
髮型：Dickson @ Chin G