袁彩雲陪住老公幸福笑晒
由拍拖到結婚，袁彩雲成日同住喺加拿大嘅老公Anthony分隔兩地，早前難得老公返咗香港，袁彩雲就做「伴遊」帶老公周圍去。日前八太就喺銅鑼灣見到佢哋兩公婆同朋友敍舊，有老公喺身邊嘅袁彩雲，連笑容都燦爛過人。
入咗行十三年嘅袁彩雲，自從舊年三月嫁咗畀喺加拿大擁有七間餐館、身家過億嘅飲食界才俊Anthony Kong後，過住幸福少奶奶生活。由於袁彩雲唔捨得香港嘅朋友，遲遲未肯過加拿大，寧願留喺香港工作，搞到兩公婆成日分隔兩地。
雖然佢話小別勝新婚，但講到生仔呢個問題，梗係愈早生愈好啦！畢竟袁彩雲已經卅五歲，所以佢最近就決定退出幕前，返加拿大同老公專心「造人」。掛住老婆嘅Anthony，早前喺加拿大返嚟，袁彩雲即刻放低晒手頭嘅工作陪老公周圍去。
老公細心等候
日前夜晚十一點，八太喺銅鑼灣見到啱啱喺附近食完飯嘅Anthony，拎住一大袋外賣行去攞車，仲開定冷氣將架車停喺門口，冇耐就見到袁彩雲同一男一女友人步出，然後齊齊上車走人。Anthony咁細心，唔怪得袁彩雲一見到老公就由個心笑咗出嚟啦！
話晒袁彩雲就快移居加國，所以佢就趁臨走前，再約多幾位朋友出嚟見吓面。事隔幾日，八太就喺中環見到佢哋兩公婆拍拖去咗ifc，同幾位朋友high tea。坐喺老公隔籬嘅袁彩雲，全程笑到見牙唔見眼，睇吓佢嘅笑容幾燦爛，似唔似拍緊牙膏廣告呢？