戴思聰聲譽毀積鬱成病

桃李滿門的戴思聰一生致力教唱歌，栽培了不少樂壇巨星，然而，自從先後發生鄭嘉穎和陳曉東的合約糾紛後，戴思聰由高高在上的老師，被指為「樂壇吸血鬼」，據知，由於當年無綫力撐嘉穎，令戴老師與無綫關係有變，戴老師擔心自己連累學生及女兒出碟受影響，故他之後收學生時，千叮萬囑他們不要向外透露自己是他們老師，用心良苦。

留下兩大遺願

據戴思聰多年好友對本報透露：「佢呢兩年患上抑鬱症，要睇心理醫生同食藥，佢又唔再睇電視，唔想諗起唔開心嘅嘢。」其好友指戴思聰生前有兩個遺願，（1）親筆寫回憶錄，計劃於今年12月70大壽時出版；（2）舉行師生演唱會。戴思聰好友說：「演唱會喺嘉穎合約糾紛前已經構思，不過發生呢件事之後，佢好驚畀人話斂財，好介意畀人話佢係『樂壇吸血鬼』，所以一直hold住冇搞。」

獨力承受委屈

而戴思聰的大女戴蘊慧（真真）接受本報電話訪問，承認父親近年鬱鬱不歡：「呢兩年爹哋的確唔開心，瘦咗好多，只係冇表現出嚟，但家人當然睇得出。」真真控訴：「好多新聞對爹哋唔公平，佢覺得好委屈。（嘉穎件事？）唔想講是非，總之係不利新聞、負面報道，爹哋唔係圈中人，佢要一個人承受，佢都一把年紀，受咗咁多委屈，佢一生人做咁多好事，我覺得應該還佢一個公道，今時今日佢走得咁安詳，係爹哋修番嚟嘅福。」

對於有傳戴思聰曾託中間人搵嘉穎，真真說：「據我所知冇聯絡。（遺願見嘉穎？）爹哋暈倒之後一直昏迷。（你有冇嬲嘉穎？）冇，嬲一個人好辛苦，當年係佢決定、選擇。（爹哋有冇嬲嘉穎？）有時會留意，好關心佢嘅新聞，但唔會評論。」

文：影視組